Шүүгчээр ажилладаг хоёр иргэн найзуудтайгаа уулзаж, уусан бололтой юм. Орцны ч юм уу, эсвэл гүйцэтгэх ажиллагааны явцад олж авсан уу бүү мэд, бичлэгийг олон нийтэд дэлгэв. Цагдаагийн байгууллагын шууд оролцоотойгоор эмэгтэйчүүдийг нь бүгдийг нь “ЯНХАН” болгов.
Яг үнэндээ бичлэг цацагдсан даруйд хамгийн их анхаарал татсан зүйл бол оршин суугчдын аюулгүй байдлыг хангах зорилгоор хийгддэг СӨХ-ны хяналтын камерын бичлэг ямар замаар олон нийтэд “ил болов” гэдэг асуулт байв. Цагдаагийн байлгууллагаас тодорхой хариулт өгнө гэсэн хүлээлт байсан ч, харамсалтай нь тийм зүйл болсонгүй.
ЦЕГ-ын хэвлэл мэдээллийн төвийн дарга Б.Баатархүүгийн ярианаас энэхүү бичлэг задарсан асуудлын хамгийн чухал, хамгийн ноцтой зүйл нь “Монгол улсын Эрүүгийн хуулийн 12.6.1-д зааснаар биеэ үнэлэлтийг зохион байгуулсан” гэмт хэрэг болохыг ойлгов. Тэрээр ингэж ойлгуулахыг хичээж, чиглүүлэв.
Цагдаагийн байгууллага үндсэн хуулиар олгогдсон хүний “халдашгүй” эрх, нэр төрөөс илүүтэй “албан тушаалтан архидан согтуурсан, биеэ үнэлэлт зохион байгуулсан” гэх үйл баримт тогтоогдсон хэмээн “урьдчилан” зарлаж, ач холбогдол өгснөөс үзвэл “гүйцэтгэх ажиллагаа явуулсан” гэдгээ хүлээн зөвшөөрөв үү.
Зөвхөн биеэ үнэлэлтийг зохион байгуулсан үйл ажиллагаанд хойшлуулшгүй арга хэмжээ авчээ. Тэгвэл хүний эрх зөрчсөн, хувь хүний нууцын тухай хууль зөрчсөн үйлдлийг хачир болгож л дурдах шив дээ.
Биеэ үнэлсэн гэдгийг хэрхэн мэдэж хойшлуулшгүй ажиллагаа явуулсан бэ? Хойшлуулшгүй ажиллагаа гэж юуг хэлдэг бэ? Хэзээ болсон үйл баримтыг олон нийтэд түгээсэн бэ? Тухайн үйл явдал болсноос 20 хоногийн дараа цацагдсан камерын бичлэг гүйцэтгэх ажиллагааны баримт болох уу?
Зүй нь эрх бүхий байгууллагын зөвшөөрснөөс бусдаар гүйцэтгэх ажиллагаа явуулахыг хориглосон албан тушаалтнуудад гүйцэтгэх ажиллагаа явуулсан, хүний эрхийн маш том асуудлыг дурссангүй, Б.Баатархүү дарга тайлбар хийсэнгүй.
Хэвлэл мэдээллийн хэрэгслээр гарсан гэмт хэрэг зөрчлийн шинжтэй мэдээллийг Цагдаагийн байгууллага иргэний гомдол гэхгүйгээр шалгах үүрэгтэй, хуулиар олгогдсон эрхтэй гэлээ. Энэ үүрэг, эрхэд харин хувь хүний “заяагдмал” эрхийг зөрчиж, хувийн нууцад халдсан асуудал хамаарсангүй ээ. Тухайн иргэд гомдол гаргавал “нягталж үзнэ” хэмээн сулхан өгүүлэв. Биеэ үнэлсэн гэмт хэргийн шинжтэй мэдээллийг “шалгаж байгаа” гэсэн шигээ чанга дуугарч чадсангүй ээ.
Гэмт хэргийн шалтгаан нөхцлийг тогтооход гэмт хэргийн үйлдэгдсэн дараалал, хор хохирлын логик хамаарал “түй ч” хамаагүй юм байна. Хамгийн эхэнд тавигдах ёстой хүний үндсэн эрхийн хажууд шүүгчийн ёс зүй “ээ чааваас” шүү.
Дори гэх эмэгтэй өчигдөр хэвлэлд яриа өглөө. Цагдаа гар утсыг булааж авч, “ДОРИ” гээд хашгирчих уу? Чамайг хүн бүхэн танина гэж доромжилсон гэх юм. Цагдаа нарт энгэрт нь камер байдаг биз дээ. Тэр бичлэгээ олон нийтэд ил болгохыг шаардаж байна. Арван хоёр цагийн турш тавын таван байцаагч нэг муу эмэгтэйг бүлтэгнүүлээд дарамталсан юм биш биз дээ.
Монгол улсын Эрүүгийн хэрэг хянан шийдвэрлэх тухай хуулийн 25.2.1: Мэдүүлгийг 4 цагийн хугацаагаар тасралтгүй авч болох ба түүнээс илүү хугацаагаар авах бол 1 цагийн завсарлага авна. Нэг удаагийн мэдүүлэг авах нийт хугацаа 8 цагаас илүүгүй байна.
Яагаад хуулийн хугацааг хэтрүүлж мэдүүлэг авсан бэ? Эндээс харахад цагдаагийн байгууллага эрүүдэн шүүх ажиллагаа явуулчихсан юм биш биз? Чи ч угаасаа л “ЯНХАН” ш дээ гэсэн өнгөөр харьцсан юм биш биз дээ.
Иргэн Доригийн ярианаас цагдаа нар түүний дансны хуулгыг “хойшлуулшгүйгээр” авчээ. Тэгвэл хэрэг мөрдөн шалгах явцдаа олж авсан мэдээллээ сэтгүүлчдэд алдаад байна уу? өгөөд байна уу? гэсэн асуулт зүй ёсоор гарч ирж байна.
Тэр эмэгтэйчүүдийн данс руу мөнгө шилжиж орсон гэх “ЭХ СУРВАЛЖ”-ийн мэдээллийг тодруулсан сэтгүүлчийн асуултад Б.Баатархүү “Прокурорын зөвшөөрөлтэйгээр мэдээлэл өгөх ёстой” гэсэн атлаа “Тиймэрхүү зүйл тогтоогдож байгаа” гэх мэтээр хариулав. Эх сурвалж нь хэн юм бэ?
Хуульд бусдын мэдээллийг прокурорын байгууллагын зөвшөөрлөөр авдаг. Гэтэл дансны мэдээллийг олон нийтэд мэдээлж байгаа нь энэ хэрэгт Прокурорын байгууллагын оролцоо байна уу? Эсвэл цагдаагийн байгууллагын ажилтан эрх мэдлээ хэтрүүлж, албан тушаалын байдлаа урвуулан ашиглаж, дээрх шиг аргаар олон нийтэд тарааж байна уу? гэх мэт олон асуултууд хөвөрсөөр.
Сошиал бол “ШҮҮХ” биш. Нотлогдоогүй баримт материалаар бусдыг яллаж, алдар нэр, цаашлаад амь насанд нь хүрч байсан гашуун түүхүүд бий. Иргэний хувийн мэдээллээр шантааж хийж байгаа үйлдэл нь бусдыг зорилготой гутаан доромжилдог улстөрчдийн арга хэрэгсэл байж таарахгүй.
Нууцгүй хэлэхэд иймэрхүү мэдээллээ сэвдэг пэйж хаяг нээдэг, эзэн нь илэрдэггүй, илрүүлдэгүй бусдын нэр хүндийг санаатайгаар гутаан доромжилдог балиар үйлдлээ зогсоох хэрэгтэй.
Албаны эрх мэдлээрээ олж авсан хувь хүний нууц тээсэн мэдээллээр ард түмний тархийг угааж, талцуулж байгаа үйлдлийг жирийн иргэд биш УЛСТӨРД нөлөө бүхий эрхэмүүд ТА НАР л хийдэг.
“ЦАГДАА” хүний эрхэд ноцтой бүдүүлгээр халдсан гэж хардах эрх сэтгүүлчид бий. Энэ үйл явдал анхнаасаа зохион байгуулалттай, чиглэсэн үйл ажиллагаа байсан юм биш үү?!
Сэтгэгдэл24
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.