Ковид-19 вакциныг буурай хөгжилтэй, хамгийн хэрэгцээт, зорилтот бүлэгт хүргэх зорилгоор өнгөрсөн оны долоодугаар сард Дэлхийн эрүүл мэндийн байгууллагын дэргэд COVAX нэгдэл байгуулагдсан. COVAX-ийг анх 64 орон нэгдэж байгууллаа гэж байв. Тэднээс дэмжлэг, туслалцаа авах хүсэлтээ дэлхийн 100 гаруй орны төр засгийн тэргүүнүүд ирүүлжээ. Одоогийн байдлаар (2021.3.11) COVAX 6,3 тэрбум ам.долларыг хандивлагч нараас цуглуулаад байна.
Олон улсын вакцин хангамжийн Ковакс хөтөлбөрийн хүрээнд манай улс AstraZeneca вакцинаас 14.400 тунг 2021 оны 3 дугаар сарын 12-ны орой хүлээн авсан тухайгаа Гадаад харилцааны яамнаас мэдэгдсэн.
Гадаад харилцааны яамны хэвлэлийн мэдээнд хандивлагч нарын талаар ганц ч үг дурдаагүй байв. /ЭНД дарж үзнэ үү/
Үүнээс нэг хоногийн дараа буюу өнөөдөр (2021.03.13) Европын холбооны Монгол дахь суурин төлөөлөгчийн газрын цахим хуудаст "хандивлагчдын талаар ганц ч үг дурдсангүй" гэсэн "ГОМДОЛ" тавигдав.
Энэхүү мэдээллийн доор сэтгэгдэл хэсэгт ДЭМБ-ын Монгол Улс дахь Суурин төлөөлөгч Др Сергей Диордица-ийн зүгээс хандивлагч нарт талархсан үгийг ч мөн нийтэлжээ.
Др Сергей Диордица: КОВАКС хөтөлбөрт томоохон хувь нэмэр оруулсан Австрали, Канад, Европын Холбоо, Япон улс, Саудын Араб, Швейцарь, Их Британи, Америкийн Нэгдсэн Улс зэрэг олон хандивлагчиддаа талархал илэрхийлье.
Эндээс харвал Гадаад харилцааны сайд Б.Батцэцэг дипломат ёсыг уландаа гишгэсэн үү? Монголчууд биднийг талархах сэтгэлгүй, бусдын тусыг мэддэггүй хэмээн шившиглэх үйлдэл хийсэн юм биш байгаа хэмээн иргэд олон нийт дургүйцлээ илэрхийлж, Монгол Улсын Засгийн газрын өмнөөс болон хувь иргэнийхээ зүгээс талархал илэрхийлэх хөдөлгөөн өрнүүллээ.
Энэ бүхний эцэст 2021 оны 03 сарын 13-ны 20 цагийн орчимд ГХЯ-аас "Гадаад харилцааны сайд Б.Батцэцэг олон улсын вакцин хангамжийн Ковакс хөтөлбөрийн хүрээнд олгож буй КОВИД-19 цар тахлын эсрэг вакциныг хүлээн авах ёслолын арга хэмжээнд хэлсэн үг"-ийг нийтэлжээ. Уг нийтлэлд ГХЯ-ны сайд Б.Батцэцэг "Монгол Улсын Засгийн газар, Улсын онцгой комиссын нэрийн өмнөөс уг хөтөлбөрт оролцож буй хандивлагч орнууд, олон улсын байгууллагууд болон төрийн бус байгууллага, хувь хүмүүст гүн талархал илэрхийлье" хэмээн алдаагаа засжээ.
.jpg)
Сэтгэгдэл1
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.