Т.Гантөмөр: Улаанбаатарчууд ийм замтай болсондоо харин ч баярлах ёстой, Энхтайвны гүүрний засварын ажлыг дууссан үед нь та нар хараарай

Хатуу хөл хорио тогтоосонтой холбогдуулан наймдугаар сард хийх ёстой байсан Энхтайваны гүүрний урсгал засварыг урагшлуулж, өнгөрсөн 10 хоногийн хугацаанд гүйцэтгэсэн билээ.

Харамсалтай нь, зам, гүүрний засварын ажил иргэдийн сэтгэлд нийцээгүйн дээр энхэл, донхолтой байсан нь бухимдуулаад амжсан. Тэгвэл гүүрний засварын ажилтай холбогдуулан Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр мэдээлэл өглөө.

Тэрбээр “Явган хүний замыг засварлахдаа тэгшлэхгүй, барзгар хэвээр нь резинээр хучвал зууралттай, тогтоцтой, шингэж орох нь сайн байдаг. Цас бороо орох тусам өнгө орно. Мөн ажлыг гүйцэтгэж буй байгууллагынхан яваандаа хагарсан, энхэл, донхолтой газрыг янзалчихна гэсэн. Би өөрийн биеэр харж байгаад ажлыг нь хийлгэх бодолтой байна.

Эл явган хүний замын нэг ам метр талбайг резинээр хучихад 45 мянга төгрөг болсон. Улаанбаатарчууд ийм замтай болсондоо харин ч баярлах ёстой. Бид хуучин халтиргаа, гулгаа үүсгэдэг замтай байсан шүү дээ. Одоогоор үлдсэн 300 орчим ам метр талбайг засварлах материалын мөнгө шийдэгдээгүй байна. Ажлыг дууссан үед нь та нар хараарай” гэв. 

Хэрэв явган зорчигчийн замын нэг амт метр талбайг резинээр хучихад 45 мянган төгрөг зарцуулсан гэж тооцвол 1400 ам метр нь 63 сая болох нь. Энэ нь зөвхөн явган зорчигчийн замыг засварласан мөнгө гэдгийг дахин сануулъя. Харин гэрэлтүүлгийн 54 шонг шинэчлэхэд 65 сая төгрөг зарцуулсан аж. Хэдийгээр Т.Гантөмөр 300 орчим ам метр талбайн засварыг хийгээгүй гэж байгаа ч албаныхан 400 ам метр талбай бий хэмээн мэдээлсэн.