Талийгаач Т 1989 онд төрсөн, Увс аймгийн Улаангом суманд эхнэр гурван хүүхдийн хамтаар амьдардаг бөгөөд аймгийн Нэгдсэн эмнэлэгт инженерээр ажилладаг байжээ.
Тэрбээр өнгөрсөн даваа гарагийн үдэш 20.00 цаг өнгөртөл гурван цагийн хугацаатай бэлтгэл хийсэн гэнэ. Түүнийгээ дуусгаад удалгүй ухаан алдсан бөгөөд аймгийн Нэгдсэн эмнэлгийн Хүлээн авах тасагт хамт байсан хүмүүс нь хүргэсэн ч нас барсан байжээ.
Т нь 2010 оноос хойш тогтмол бэлтгэл хийж ирсэн, ямар нэгэн суурь өвчингүй, эрүүл чийрэг нэгэн байсныг эх сурвалжууд хэлж байлаа. Харин өнгөрсөн зун болон намар хоёр удаа короновирусын халдвар авч эмчлүүлсэн байна.
Эхний удаа харьцангуй хөнгөн харин хоёр дахь удаа нэлээн хүнд өвджээ. Түүнээс хойш зүрх нь үе үе өвддөг зовууртай болсон бөгөөд өнгөрөхөөсөө хэд хоногийн өмнө "зүрхний эход харуулж эмчид үзүүлнэ" гэж ярьж байсан талаар эх сурвалж хэлсэн юм.
Талийгаач ковидын халдвараар өвдөж, эдгэснийхээ дараа хэд хэдэн сумын барилдаанд оролцоод байжээ. Харин энэ удаад оролцохоор бэлтгэл хийж байсан үндэсний бөхийн барилдаан нь Увс аймгийн Өмнөговь суманд болох байв. Гэсэн ч уг харамсалтай явдлын улмаас барилдааныг хойшлуулсан байна.
