Олон нийтийн сүлжээнд уран зохиол, дуу хөгжим, технологи гэх гурван хичээлийг сургалтын системээс хассан гэх мэдээлэл цацагдаад байгаа билээ. Харин энэхүү асуудалд Боловсрол, шинжлэх ухааны сайд Л.Энх-Амгалан дараах тайлбарыг хийжээ.
Тэрээр "Хэвлэл мэдээллийн байгууллага өөрийн лого тэмдгээ тавьж байгаад ийм худлаа мэдээлэл оруулж, бүхэл бүтэн боловсролын салбарын бодлогыг харлуулах нь ёс зүйд нийцэхгүй. Доорх хичээлийг хөтөлбөрөөс хассан гэх эх сурвалж, баримтаа тавь. Байхгүй бол залруулга хийх ёстой шүү. Хэвлэл, мэдээллийн байгууллага цуурхал тараагч. Сенсаац хөөгч байх ёсгүй" гэв.
Эргэн сануулахад Боловсрол, шинжлэх ухааны сайд Л.Энх-Амгалан боловсролын "Цөм" хөтөлбөрийг хэрэгжүүлж эхлэхтэй холбогдуулан хичээлийн тоог цөөлж, ижил агуулгатай хичээлүүдийг нэгтгэхээр болсон тухай дараах мэдээллийг өгсөн.
Тэрээр, Бидний дараагийн хөтөлбөрт шилжих гээд байгаа гол шалтгаан бол Монгол хүүхдийн үзэж байгаа хичээлийн тоо их байна, ачаалал их байна, анги дэвших тусам суралцах сонирхол буурч байна гэдэг нь судалгаагаар гарчихсан шүү дээ.
Манай хөтөлбөрүүд их сонирхолгүй байгаа. Хичээлийн агуулга, чанар зэрэгт орчин цагийн технологи оруулсан байдал хангалтгүй байна. Тэгэхээр бид энэ жилийн 9 дүгээр сарын 1-ээс авхуулаад сургуулийн өмнөх болон бага боловсролын сургалтын хөтөлбөрөө шинэчилнэ. 2025 оноос дунд болон ахлах ангийн сурагчдын хичээлийн шинэчлэл хийгдэнэ.
Үүн дээр бид хичээлийн тоог цөөрүүлэх, хичээл хоорондын агуулгыг хооронд нь интеграци хийнэ. Ямар ч байсан хөтөлбөрийн шинэчлэлт хийнэ гэдгээ зарлаад хуулиа батлууллаа. Хамгийн гол нь нэг хөтөлбөрөөс нөгөө хөтөлбөрт шилжихэд сэтгэлийн хөөрлөөр, эсвэл хэн нэгэн улстөрчийн үзэмжээр шилжиж болохгүй. Дунджаар бид хичээл хоорондын агуулгаас хамаараад 3-6 хичээлийг цөөлнө. Ингэхдээ хичээлийг шууд хасчих бус ижил агуулгатай хичээлүүдийг нэгтгэж, давхардлыг арилгана.
Өөрчлөгдөхгүй хичээлүүд нь байгалийн шинжлэх ухааны суурь хичээлүүд байх бол өмнө жил үзсэн хичээлийг дараа жил бататгах байдлаар ордог байдлыг болиулна. Мөн гуравдугаар ангиас эхлэн англи хэлний хичээл оруулж эхлэх тал дээр салбар яамнаас ажиллаж байна гэжээ.
.jpg)
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.