Баасан гарагийн орой Лос-Анжелес хотод хандивлагчдын хүлээн авалтад оролцохдоо АНУ-ын ерөнхийлөгч Жо Байден өнөөдөр Украинд дөрөв дэх сардаа үргэлжилж буй дайныг гарна гэдэгт хэн ч итгэхгүй байсан тухай ярьжээ.
“Дэлхийн хоёрдугаар дайнаас хойш ийм үйл явдал огт болж байгаагүй. Тиймээс олон хүн намайг хэтрүүлэн сүржигнэж байна гэж бодож байсныг би мэднэ. Гэхдээ бид Путинийг хилийн дээс алхах гэж буйг батлах мэдээлэлтэй байсан. Үүндээ огт эргэлзээгүй. Харин Зеленский үүнийг сонсохыг ч хүсээгүй” гэж Байден ярьсан байна.
Бямба гарагт Украины ерөнхийлөгч Володимир Зеленский видео холбоогоор Сингапурт болж буй Шангри Лагийн Уулзалт аюулгүй байдлын чуулганд оролцож үг хэлжээ.
“Оросын эхлүүлсэн энэ дайнд бид ялах нь тодорхой. Дэлхийг ирээдүйд хэн захирахыг өнөөдөр Украины дайны талбарт шийдэж байна” гэж тэр хэлсэн байна.
Тэрбээр бас Хар тэнгисийн экспортын замд хаалт тавьсан Орос улс Ази, Африкийн олон орныг өлсгөлөнд автуулахаар айлгаж буйг энэ үеэр ярьжээ.
“Хэрвээ Оросын хаалт манай хүнсний экспортыг үргэлжлүүлэн саатуулбал дэлхий нийт хүнсний ноцтой хямралд нэрвэгдэж, Ази, Африкийн олон орон өлсгөлөнд автах аюултай байна” гэж Зеленский хэлсэн байна.
Луганск мужийн Северодонецк хот одоо Украины дайны хамгийн халуун цэг болоод байгаа. Балгас болсон хотын гудамжнуудад ширүүн тулаан үргэлжилж, талуудын аль аль нь давуу тал олж чадаагүй байгааг эх сурвалжууд мэдээлж байна.
“Гудамжнаас гудамжны хооронд ширүүн тулаан үргэлжилж, талуудын аль аль нь хүн хүчний ихээхэн хохирол амсаад байна” гэж Их Британийн батлан хамгаалах яам өчигдөр өөрийн тагнуулын эх сурвалж дээр үндэслэн мэдээлжээ.
Эх сурвалж: Reuters
.jpg)
Сэтгэгдэл1
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.