АНУ-ын Конгрессын Төлөөлөгчдийн танхимын дарга Нэнси Пелоси энэ сарын 3-нд Тайваньд богино айлчлал хийгээд буцав. Тэрээр “Бид Тайванийг хэзээ ч ганцааранг нь орхихгүй” гэжээ.
Түүний айлчлалын дараа БНХАУ-ын цэргийн сургуулилт идэвхжжээ. Арлын эргэн тойрны зургаан бүсэд өнөөдрөөс эхлэн даваа гараг хүртэл сургуулилт үргэлжилнэ.
Тайванийн тал хятадын 27 байлдааны онгоц агаарын бүсэд нь нэвтэрсэн гэжээ. Тэдэнд анхааруулга өгөх зорилгоор Тайванийн Батлан хамгаалах яам өөрсдийн сөнөөгч онгоцоо хөөргөсөн байна.
“Ройтерс” агентлаг дронтой төстэй зүйл Тайванийн Кинмэн арлын дээгүүр ниссэн, энэ нь Тайваниас хэдхэн цагийн зайтай гэж мэдээлжээ. Тайвань эдгээрийг холдуулахын тулд ослын утаагаар дохио өгсөн байна.
Тайванийн цэргүүд байлдааны бэлэн байдалд байна.
Нэнси Пелосигийн айлчлалын өмнө БНХАУ дэлхийн хамгийн их ачаалалтай усан замын нэг болох Тайванийн хоолойд бэлтгэл хийн, холын зайн тусгалтай пуужин хөөргөнө гэдгээ мэдэгдсэн юм. Харин Тайваньчууд Украин шиг байдалд орох вий хэмээн эмээж байна.
Мөн Тайванийн эрх баригчид хөрш Япон, Филиппиний талтай агаарын шинэ зам нээх талаар ярилцаж эхэлжээ.
Пелосигийн айлчлалын дараа ИХ7-гийн орны Гадаад хэргийн сайд нар хамтарсан мэдэгдэл гаргаж, “БНХАУ айлчлалыг шалтаглан бүс нутгийн тогтвортой байдалд эрсдэлтэй алхам хийж байна. Цэргийн түрэмгий ажиллагаа явуулах шаардлагагүй юм. Парламентын гишүүд бусад улсуудад айлчлах нь энгийн үзэгдэл” гэжээ.
Нэнси Пелоси айлчлалынхаа дараа “Дэлхийн удирдагчид, ер нь ямар ч хүн Тайваньд айлчилж, тэдний ардчиллыг хүндэтгэх эрхтэй. Мөн тэдний амжилтаар бахдан, хамтын ажиллагаагаа баталгаажуулах зорилгоор айлчлахад БНХАУ саад болохгүй” гэсэн юм.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.