Мозамбик, Малави улсуудыг дайрсан халуун орны Фредди хар салхины улмаас амиа алдсан хүний тоо 200 даваад байна. Гамшгийн дараах эрэн хайх, аврах ажиллагаа үргэлжилж буй учир амь үрэгдсэн хүний тоо нэмэгдэж болзошгүйг албаныхан хэлж буй.
Фредди хар салхи үер, хөрсний гулсалт дагуулсан байна. Байгалийн гамшигт Малави улсад 190 хүн амиа алдаж 37 хүн сураггүй болсон бол Мозамбикт 20 хүн амь үрэгдсэн нь тогтоогджээ. Хохирогчдын дийлэнх нь байшин нь хөрсний гулсалтад нурсны улмаас амь эрсэджээ.
Гамшгийн бүсэд 20 мянга гаруй хүн орон гэргүй болсон бөгөөд бороо үргэлжлэн орсоор байгаа нь нөхцөл байдлыг хүндрүүлж байна. Катарт болсон НҮБ-ын чуулганд оролцсоныхоо дараа эх орондоо эргэн ирсэн Малавийн Ерөнхийлөгч Лазарус Чаквера аврах ажиллагаан дахь сайн дурынхны оролцоог сайшаасан байна.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.