“Бүлэг 20”-ийн уулзалтад Ши Жиньпин оролцохгүй

Дэлхийд эдийн засаг, улс төр, аж үйлдвэрийн салбарт манлайлал үзүүлдэг гэж хэлж болох “Бүлэг 20” орны төр засгийн тэргүүнүүдийн 18 дахь удаагийн дээд хэмжээний уулзалт Энэтхэгийн нийслэл Шинэ Дели хотод болох гэж байна. Энэ жилийн дээд хэмжээний уулзалтыг даргалж байгаа Энэтхэгийн Засгийн газар есдүгээр сарын 9-10-ны өдрүүдэд энэ долоо хоногийн амралтын өдрүүдэд гол уулзалтуудыг зохион байгуулна.

“Бүлэг 20”-ийн дээд хэмжээний уулзалтад БНХАУ-ын дарга Ши Жиньпин оролцоно гэсэн хүлээлттэй байсан. Гэвч Хятадын дарга биечлэн ирж оролцохгүй гэдгийг мэдэгдээд байна. Уг мэдээг сонссон АНУ-ын Ерөнхийлөгч Жо Байден Хятадын даргатай Делид уулзаж чадахгүй болсондоо сэтгэл дундуур байгаагаа илэрхийлжээ. Вашингтон Бээжинтэй харилцаагаа эргэн сэргээх хүсэл эрмэлзэлтэй байгаа тул Байден энэ удаад биш ч дараагийн удаад уулзана гэдэгт итгэж байна гэжээ.

Дэлхийн тэргүүлэгч хоёр гүрэн болох Америк, Хятадын хооронд худалдааны маргаанаас авахуулаад, Тайванийн ирээдүй, Өмнөд Хятадын тэнгис дэх Хятадын байр суурь зэрэг олон тооны ээдрээтэй асуудал удаан хугацаанд буглаж байна. Ажиглагчдын мэдээлж байгаагаар хоёр гүрний харилцааг сайжруулахад Вашингтон арай илүү хүчин чармайлт гаргаж ойрын саруудад өндөр дээд албаны төлөөлөгчдөө Хятад руу илгээсээр байна.

Европын холбооны албаны эх сурвалж “Бүлэг 20” орны дээд хэмжээний уулзалтад Хятадын дарга Ши Жиньпиний оронд Хятадын төрийн зөвлөлийн Ерөнхий сайд Ли Цян төлөөлөн Делид ирнэ гэдгийг өнгөрсөн долоо хоногт мэдэгджээ.