Бямба гарагт явагдсан санал хураалтаар Тайванийн эрх баригч Ардчилсан дэвшилт намын нэр дэвшигч, өнөөгийн дэд Ерөнхийлөгч Лай Чинг-тэ олонхийн санал авсан юм. Түүний дэд ерөнхийлөгчөөр Тайваниас АНУ-д суух төлөөлөгчөөр томилогдон ажиллаж байсан Шиао Би Хим сонгогдов.
“Бид Тайванийг дэлхийн газрын зураг дээр үлдээж чадлаа. Тайванийн ард түмэн ардчиллын төлөөх тууштай байдлаа дэлхий дахинд батлан харууллаа. Хятад улс үүнийг ойлгоно гэж найдаж байна" хэмээн Лай ялалтаа тэмдэглэх цуглаан дээр нийтэд хандан хэлжээ.
Тэгвэл сонгуулийн дүн гарсны дараа Хятадын ГХЯ-ны хэвлэлийн төлөөлөгч “Тайваньд ямар ч өөрчлөлт гарсан бай, дэлхий дээр ганц Хятад байдаг. Тайвань бол Хятадын нэг хэсэг гэсэн үндсэн баримт өөрчлөгдөхгүй” гэж мэдэгдлээ. Хэвлэлийн төлөөлөгч үргэлжлүүлэн "Нэг Хятадын зарчим бол Тайваний хоолойн энх тайван, тогтвортой байдлын баталгаа юм. Олон улсын хамтын нийгэмлэг нэг Хятадын зарчмыг үргэлжлүүлэн баримталж, Тайванийн салан тусгаарлах үйл ажиллагааг эсэргүүцэж, үндэстнээ нэгтгэх гэсэн Хятадын ард түмний шударга үйлсийг ойлгож, дэмжинэ гэдэгт бид итгэж байна" хэмээлээ.
Харин АНУ-ын Төрийн нарийн бичгийн дарга Антони Блинкен "Санал хураалт нь Тайванийн хүчирхэг ардчилсан тогтолцоо, сонгуулийн үйл явцын хүч чадлыг харууллаа” гэж мэдэгджээ.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.