Хятадын эрдэмтэд сармагчны хамгийн эртний овог аймгуудын нэг болох резус-макак буюу нохой сармагчныг анх удаа эсийн аргаар үржүүлж шинжлэх ухааны салбарт бас нэгэн ахиц дэвшлийг харууллаа. Уг үүлдрийн сармагчны бие махбодийн бүтэц нь хүнийхтэй хамгийн их төстэй байдаг учраас анагаах ухаан, эрүүл мэндийн салбарын судалгаанд ихээр ашиглагддаг юм.
Эрдэмтдийн үзэж байгаагаар резус сармагчныг эсийн аргаар үржүүлснээр эмийн туршилт, судалгааны хугацааг хурдасгах боломжтой болж байгаа юм. Өмнө нь бусад орны эрдэмтэд резус сармагчныг хуулбарлан үржүүлэх оролдлогыг хийж байсан боловч бүтэлгүйтсээр иржээ. Нэг бол сармагчин төрж чаддаггүй, эсхүл төрөөд хэдхэн цаг болоод л үхчихдэг байжээ.
Нэг амьтны эсийг ашиглаж ижил хуулбарыг бүтээх технологиор бүтээгдсэн хамгийн алдартай амьтан бол 1996 онд бүтээгдэж байсан Долли хонь юм.
Хятадын Шинжлэх ухааны академийн их сургуулийн эрдэмтэд Ретро нэртэй резус сармагчныг 2020 оны долоодугаар сарын 16-ны өдөр бүтээсэн байна. Уг сармагчин өнөөдөр бараг дөрвөн нас хүрэх гэж байгаа бөгөөд өсөлт хөгжил нь хэвийн явагдаж байгааг Nature сэтгүүлд нийтэлжээ. Сармагчин өдгөө эрүүл өсөж торниж байгаа нь эрдэмтдийн туршилт амжилттай болсныг харуулж байна. Энэ туршилтыг амжилттай явуулж байгаа эрдэмтэд 2018 онд өөр төрлийн сармагчныг эсийн аргаар үржүүлж чадсан байна. Макак овгийн синомолгус сармагчны хоёр хуулбарыг эсийн аргаар бүтээсэн нь амжилттай болж байжээ.
Хятадын Шинжлэх ухааны академийн их сургуулийн эрдэмтэн доктор Фалон Лю туршилт амжилттай болсонд салбарынхан бүгд баяртай байгааг хэлсэн байна.
Гэвч зарим нэг амьтны эрхийг хамгаалах байгууллагууд эрдэмтэдтэй санал нэгдэхгүй байна. Учир нь хүний эрх ашгийн төлөө амьтдыг хэт их тарчлаан зовоож байгааг эсэргүүцжээ.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.