.jpg)
Индонез улсын Умард Сулавеси муж дахь Руанг галт уул мягмар гарагт идэвхжсэнээс хойш өнөөдрийг хүртэл таван удаа дэлбэрчээ.
Галт уул оргилж эхэлснээс хойш тэнгэрт 1600 метр орчим өндөр утаа уугиж ойролцоох суурьшлын бүсээс иргэдийг нүүлгэн шилжүүлэх ажлыг эхлүүлсэн байна. Мөн тус галт уулаас 100 км-т байдаг Манадо хотын Сэм Ратуланги олон улсын нисэх буудлын үйл ажиллагааг өнөөдрөөс эхлэн 24 цагийн хугацаанд зогсоожээ. Учир нь галт уулаас цацагдаж байгаа үнс нурам, утаа онгоц нисэх үзэгдэх орчныг хязгаарлаж болзошгүй байна.
Албаны хүмүүсийн санааг хамгийн ихээр зовоож байгаа зүйл нь галт уул далай тэнгисийн ус руу нуран орж болзошгүй байна. Хэрэв тэгвэл цунами үүсэж болзошгүй гэдгийг анхаарууллаа.
Ийм явдал 1871 онд тохиолдож байв. Тиймээс галт уулын зүүн хойд талд орших Тагуландан арлын оршин суугчдыг мөн нүүлгэн шилжүүлэх шаардлагатай болжээ.
2018 онд Индонез улсад Анак Кракатау нэртэй галт уул дэлбэрч нурсан хэсэг нь далай тэнгисийн ус руу унаж цунамийн давлагаа үүсч байсан. Улмаар Суматрта болон Жава мужийн эргийн оршин суугчид цунамид өртөж 430 хүн амь эрсдэж байжээ.
Далайн түвшнээс дээш 725 метр өндөрт байдаг галт уулын идэвхжил цаашид улам нэмэгдэхээр байгааг анхаарууллаа. Тиймээс гуравдугаар түвшний түгшүүр зарласан байснаа дөрөвдүгээр түвшин болж нэмэгдүүлжээ. Мөн галт уулын эргэн тойрон дөрвөн км-т хөл хорио тогтоосон байсныг зургаан км болгож өргөжүүлсэн.
Одоогоор галт уулын дэлбэрэлтийн улмаас хүн гэмтэж бэртсэн, нас барсан тохиолдол гараагүй.
.jpg)
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.