Токиогийн олимпын эмэгтэйчүүдийн 10 метрийн хийн гар бууны буудлагын төрлийн урьдчилсан шалгаруулалт өнөөдөр явагдаж шигшээ тэмцээнд оролцох 8 тамирчнаа шалгарууллаа. Энэ төрөлд Монгол улсыг төлөөлөн залуу тамирчин Ц.Анударь оролцсон юм. Тэрбээр 53 орны тамирчидтай өрсөлдөж, шилдэг 8-д ороход ганцхан оноо дутан 9 дүгээрт жагслаа.
Залуу тамирчин маань тэмцээнд оролцсон сэтгэгдэлдээ “Миний хувьд өөрийгөө сайн буудсан гэж бодож байна. Миний контрол нэгдүгээр байранд орсон хүнээс нэгээр л дутуу байсан. Сүүлийнхээ 2-3 сумыг алдчихлаа. Багшгүй явж байсныг хэлэх үү. Тэмцээнд оролцож байхад өөрийнхөө хэдэд явж байгаагаа харах боломжгүй, гарч ирээд харахад 9 дээр таслуулсан байсан. Багштай байсан бол оноо самбараа хянаад, зөвлөж чиглүүлээд явсан бол зүгээр байх байлаа” гэж дурдсан юм. Мөн тэрээр Шүтэж биширдэг, дэлхийн тамирчидтай цуг буудна гэдэг нэр төрийн хэрэг байлаа хэмээн хэлж байв.
Токиогийн олимпын эмэгтэйчүүдийн 10 метрийн хийн гар бууны буудлагын төрөлд БНХАУ-ын Жиан Раншин 587 оноо, Грекийн А.Коракаки 585 оноо, ОХУ-ын В.Бацарашкина 582 оноо, БНХАУ-ын Лин Ю Мэй 579 оноо, Францын М.Ламоле 578 оноо, Болгарын А.Костадинова 578 оноо, Украины О.Костевич 577оноо, Францын С.Говервил 577оноогоор тус тус шигшээд шалгарсан байна. Манай улсын тамирчин Ц.Анударь 60 суманд 96, 97, 95, 97, 97, 94 буудан нийт 576 оноо авсан юм.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.