Нийслэлийн Хан-Уул дүүргийн 15 дугаар хороонд явган хүний гарцанд тулгасан 16 давхар барилга баригджээ.
Тус барилгын ерөнхий захиалагчийг олж уулзахаар очвол мэдээлэл өгөх хүн олдсонгүй. Мөн барилгын ажил хэзээ эхэлсэн, хэзээ дуусах талаар ерөнхий мэдээллийн самбар алга.
Туслан гүйцэтгэгч компанийн ажилчид "Барилгын ажил жилийн өмнө эхэлсэн. Ажил дуусах тун дөхсөн. Улсын комисс хүлээж аваагүй байгаа. Энэ бол 16 давхар, ажилчдын орон сууц. Ажилчид нь өөрсдөө зөвшөөрөөд бариулсан" гэх товч хариулт өгөөд захиалагч компанийг мэдээлэх боломжгүй гэв.
Нийслэлийн мэргэжлийн хяналтын газраас тодруулахад "Хотын стандарт, орчны аюулгүй байдлын хяналт, зохицуулалтын газраас Улсын комиссыг зохион байгуулж ажилласан. Манай газраас энэ барилгад хяналт, шалгалт хийгээгүй. Улсын комиссод нь ч оролцоогүй. Хот байгуулалт, хөгжлийн газраас барилгын зөвшөөрлийг олгодог" гэлээ.
Хот байгуулалт, хөгжлийн газраас тодруулахад "Архитектур төлөвлөлтийн даалгавар буюу барилга барих зөвшөөрлийг 2018 онд олгосон. Ингээд 2019 онд үйлчилгээтэй орон сууц барих ажлыг эхлүүлэх зөвшөөрлийг авсан байна" гэж мэдээллээ.
Гэвч дээрх барилгын эргэн тойронд оршин суугчид амарч тухлах ногоон байгууламж, тоглоомын талбай болон авто зогсоол байгуулах боломжгүй. Авто замын уулзварт тулган барьсан нь иргэдийн эрүүл, аюулгүй орчинд амьдрах эрх зөрчигдөх эрсдэлтэй байна.
.jpg)
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.