MEC: Х.Баттулгын рейтинг өсч, Л.Оюун-Эрдэнэ, У.Хүрэлсүх нарын рейтинг огцом унажээ
Ерөнхийлөгчийн сонгууль хаяанд ирсэн энэ цагт Улстөрийн барометр ээлжит судалгааны дүнгээ танилцууллаа.
Монгол улсын Ерөнхийлөгчийн үйл ажиллагаанд өгсөн үнэлгээ өмнө сарынхаас 0,4 функтээр өсчээ.
УИХ-ын үйл ажиллагааны үнэлгээ өмнөх сараас 0,1 функтээр буурсан байна.
Монгол Улсын Ерөнхий сайдын үйл ажиллагаанд өгсөн үнэлгээ өмнөх сарынхаас 0,5 функтээр эрс буурсан үзүүлэлт гарчээ. Үүнд коронавирусын цар тахлын эсрэг авч хэрэгжүүлж байгаа арга хэмжээ үр дүнгээ өгөхгүй байгаа, нөхцөл байдал өдөр өдрөөр дордож байгаа зэрэг хүчин зүйл нөлөөлсөн. Өнгөрсөн оны 12 дугаар сард У.Хүрэлсүхийн Засгийн газар "суурь төлбөрийг тэглэх" шийдвэр гарахад Ерөнхий сайдын рейтинг огцом өсч байсан билээ. Энэ удаад иргэн бүрт 300000 төгрөг өгч, 14 хоногийн хатуу хөл хорио тогтоосон ч эсрэгээрээ Ерөнхий сайд Л.Оюун-Эрдэнийн рейтинг унажээ.
Нийслэлийн Засаг дарга Д.Сумъяабазарын үйл ажиллагаа өмнөх сарынхаас мөн л 0,2 функтээр буурчээ. Д.Сумъяабазарын хувьд олон нийтэд үзэгдэхгүй, чимээгүй байх тусмаа л рейтингээ хадгалж байдаг сонин зүй тогтол ажиглагддаг.
Үйл ажиллагаа нь таалагддаг улс төрчдийг Ерөнхий сайд Л.Оюун-Эрдэнэ тэргүүлсэн хэдий ч анх томилогдсон цаг хугацаатай харьцуулбал түүний рейтинг тасралтгүй унаж байна. Өнгөрсөн хоёрдугаар сард 5-35 хувь хүртэл огцом өсч орж ирсэн түүний рейтинг 29 хувь руу буулаа. Жагсаалтын хоёрдугаарт Ерөнхийлөгч Х.Баттулга 27 хувьтайгаар, өмнөх сарынхаас нэг хувийн өсөлттэй гарчээ. Тэгвэл У.Хүрэлсүх Ерөнхий сайдаасаа буух үеэсээ буюу өнгөрсөн гурван сарын хугацаанд 10 хувиар буурлаа. Жагсаалтад УИХ-ын гишүүн С.Одонтуяа шинээр орж иржээ.
Үйл ажиллагаа нь таалагддаггүй улс төрчдийг Шадар сайд С.Амарсайхан тэргүүллээ. Түүний хувьд гэр бүлтэй нь холбоотой хэд хэдэн шударга бус үйлдлээрээ олон нийтийн дургүйцлийг ихээр хүргэж, анх удаа энэ жагсаалтад орж ирсэн явдал нь анхаарал татаж байна. Жагсаалтын хоёрдугаарт С.Эрдэнэ орсон бол шинээр УИХ-ын гишүүн Ц.Анандбазар "Сүнээ-Хүчирхийлэл" гэсэн үндэслэлээр орж ирлээ. Үйл ажиллагаа нь таалагддаг болон таалагддаггүй гэсэн үзүүлэлтийн аль алинд нь багтсаар ирсэн улстөрч бол У.Хүрэлсүх. Тэрээр энэ удаад ч мөн таалагддаггүй улстөрчдийн гуравдугаарт, 14 хувьтай буюу өмнөх сараас өссөн байдалтай үнэлэгджээ.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.