Дэлхийн банк, санхүүгийн төв болох АНУ-ын Нью-Йорк хотын “Уолл Стрийт”-д байрлах “Нью-Йорк Меллон банк”-ны дэд ерөнхийлөгчөөр Н.Содонтуяа ажиллахаар болсон байна.
Тодруулбал, тэрээр дэлхийд тэргүүлэгч хөрөнгө оруулалтын “Нью-Йорк Меллон банк”-ны эрсдэл болон комплаенс хэлтэст 2021 онд дадлагажигчаар ажилласан бөгөөд банкнаас түүний хичээл, зүтгэл, чадварыг нь үнэлж үргэлжлүүлэн тус хэлтсийг хариуцсан дэд ерөнхийлөгчөөр ажиллах саналыг тавьжээ.
Н.Содонтуяа нь Хэнтий аймагт төрж, бакалавраа бизнесийн чиглэлээр “Санхүү эдийн засгийн их сургууль”-ийг төгссөн байна. Тэрээр цааш Тайванийн “Азийн их сургууль” мөн энэ онд АНУ-ын “Калифорнийн их сургууль”-д бизнесийн удирдлагын магистрын зэргээ хамгаалжээ.
Түүнийг бизнесийн сургуулийн шилдэг сайт болох “Poets and Quants”-аас 2022 оны бизнесийн удирдлагаар төгсөгч шилдэг 100 залуусын нэгээр шалгаруулж, онцлон ярилцлага хийсэн байна. Тус ярилцлагад түүнийг Монголын хамгийн залуу “CFA” цолыг эзэмшигч, бизнес эрхлэгч хэмээн дурджээ.
Энэ талаар тэрээр өөрийн цахим хуудсанд “Poets&Quants-ын бизнесийн удирдлагаар төгсөгч шилдэг 100 залуусын нэгээр тодорсонд үнэхээр баяртай байна. Та бүхний дэмжлэг, урмын үгс бүхэнд баярлалаа” хэмээн хуваалцжээ.
Эх сурвалж: itoim
.jpg)
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.