УИХ-ын гишүүн Г.Амартүвшин, Г.Дамдинням, Х.Ганхуяг болон нэр бүхий гишүүд Бизнесийн зээлийн хүүг 50 хувь бууруулах тогтоолын төслийг /2021.01.08/-нд УИХ-ын даргад өргөн барилаа.
Уг тогтоол батлагдсанаар бизнесийн салбарын иргэд, ААН-ийн 2021 оны нэгдүгээр сарын 1-ээс өмнө банк, банк бус санхүүгийн байгууллагаас авсан бүх зээлийн хүүг 50 хувиас багагүйгээр хөнгөлөх, эх үүсвэрийг нь төрөөс гаргах, мөн нийт арилжааны зээлийн хүүгийн эргэн төлөлтийг 2021 оны 12-р сарын 31 хүртэл хойшлуулах зэрэг бизнес эрхлэгчдийг дэмжих шийдвэр гарна гэж тогтоолын төсөл өргөн барьсан гишүүд үзэж байгаа ажээ.
Гэвч үүний ард төсөл санаачлагчдын эрх ашиг нуугдаж байх вий гэсэн хардлага, болгоомжлолыг иргэд цахим орчинд илэрхийлээд байна.
УИХ-ын залуу гишүүд болох Г.Амартүвшин, Х.Ганхуяг, Г.Дамдинням нар “Вертекс майнинг партнерс” ХХК-тай эрх ашгаараа холбогддог тухай өмнө нь ч хэвлэлд гарч байсан. Энд дарж үзнэ үү.
УИХ-ын гишүүн Г.Дамдиннямын УИХ-ын гишүүнээр нэр дэвшихдээ гаргаж өгсөн хувийн ашиг сонирхлын урьдчилсан мэдүүлгээс харвал, тэрээр “Вертекс майнинг партнерс” ХХК-ийн 20 хувь, “Хера инвестмент” ХХК-ийн 10 хувийг эзэмшдэг гэдгээ мэдүүлсэн байна.
Тэгвэл УИХ-ын гишүүн “Хера”-ийн гэх тодотголтой Хассуурийн Ганхуяг хувийн ашиг сонирхлын урьдчилсан мэдүүлэгтээ “Хера инженеринг” ХХК-ийн 50 хувийг эзэмшдэг гэж мэдүүлжээ.
УИХ-ын гишүүн Г.Дамдиннямын хувь эзэмшдэг “Вертекс майнинг партнерс” ХХК-ийн Гүйцэтгэх захирал нь Хассуурийн Хашчимэг гэх иргэн болохыг хуулийн этгээдийн улсын бүртгэлийн мэдээллээс төвөггүй харж болно.
Хассуурийн Хашчимэг нь УИХ-ын гишүүн Хассуурийн Ганхуягийн хамаарал бүхий этгээд мөн бол УИХ-ын гишүүн Г.Дамдинням, Х.Ганхуяг нарын ашиг сонирхлын зөрчил ”Хера” болон “Вертекс майнинг партнерс” дээр давхцаж байна.
УИХ-ын гишүүн Г.Амартүвшин нь 2019 оны 5 сард Хөгжлийн банкны Гүйцэтгэх захирлаар томилогдон ажиллаж байгаад сонгуульд өрсөлдөх болсон тул хуулийн дагуу ажлаа хүлээлгэн өгсөн байдаг. Түүнийг Хөгжлийн банканд ажилласан богинохон хугацаандаа ашиг сонирхлын зөрчилтэй зээл гаргасан гэсэн хов жив тойрдоггүй ээ.
Түүний нэг нь УИХ-ын гишүүн Г.Дамдиннямын “Вертекс майнинг партнерс” ХХК-д 34 тэрбум 566 сая төгрөгийн зээлийг сонгуулийн өмнөхөн гаргаж өгсөн явдал. Өөрөөр хэлбэл, УИХ-ын Г.Амартүвшин, Х.Ганхуяг, Г.Дамдинням нарын эрх ашгийн хугарлын цэгийг “Вертекс майнинг партнерс” ХХК-д олгосон 34 тэрбум 566 сая төгрөгийн зээл гэж үзэж болно. Энд дарж үзнэ үү.
Хөгжлийн банк нь ашгийн төлөө төрийн өмчит хуулийн этгээд бөгөөд хөгжлийн томоохон төсөл, хөтөлбөрийг санхүүжүүлэх, үнэт цаас гаргах, худалдах, худалдан авах, өөрийн нэрийн өмнөөс зээлийн баталгаа батлан даалт гаргах, гадаад валют арилжаа, зээлтэй холбоотой төлбөр тооцоо хийх зэрэг үйл ажиллагаа эрхэлдэг.
Монгол улсын Ерөнхийлөгч Х.Баттулга үндэсний үйлдвэрлэлээ сэргээх, аж ахуйн нэгжүүдээ дэмжих, хэрэглэгчдээ мөнгөжүүлэхийн тулд “Өрх бүрт-нэг сая” санаачилга гаргахдаа “өөрийн хамаарал бүхий аж ахуйн нэгжийг хамруулахгүй” гэдгээ ил тод зарласан билээ.
Хэдийгээр эрхэм гишүүдийн санаачилсан тогтоолын төсөлд жижиг дунд үйлдвэрлэл, бизнес эрхлэгчид болон иргэн, ААН-д банк, банк бус санхүүгийн байгууллагаас олгосон зээлийн хүүг гэж дурдсан байгаа ч гишүүдийн Хөгжлийн банкнаас авсан зээл үүнд хамаарахгүй гэдгээ тодорхой зарлахыг ШААРДАЖ байна.
.jpg)
Сэтгэгдэл9
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.