УИХ-ын гишүүн Г.Амартүвшин Хөгжлийн банкны захирлаар ажиллаж байхдаа өгсөн зээлүүд дунд УИХ-ын гишүүн Г.Дамдинням, Х.Ганхуяг нарын хамаарал бүхий компани 33 тэрбум төгрөгийн зээл авсан тухай дуулиан өнгөрсөн сард дэгдсэн.
Үүнтэй холбогдуулан “Алтан дорнод Монгол” компанийн захирал Тордайн Ганболд өөрийн цахим хуудаснаа байр сууриа илэрхийлжээ.
Тэрбээр "33 тэрбумыг Хөгжлийн банкнаас авсан гурван гишүүнийг шууд намаасаа хөөгөөд мөнгөө буцаагаад төл гэж хэлэх эрх МАН-д бий. Энэ зүгээр нэг иргэн, аж ахуйн нэгжид гардаг зээл биш. Ганц энэ жишээн дээр л гэхэд тэгш эрх гэдэг ойлголт байхгүй байгаа биз дээ? Үүнийг харсаар байж мэлздэг болчихсон.
Өмнөх хулгайч, өмнөх эрх мэдэлд байсан улсууд нь хүчний тэнцвэр нь алдагдаад, унаад эрх мэдэлгүй болчхоороо хэлмэгдлээ гэж орилолддог. Дараагийн ээлж нь, хоолондоо орчихсонууд нь нөгөө тэгш эрх, шударга ёсоо илт нүүрэн дээр худлаа ярьсаар байгаад дээрэмдээд, цар тахлын үед өчнөөн олон тэрбумын үнэтэй фонтан, хөшөө барьж галзуурна...
Энэ бүхнийг нийгмээрээ жигшдэг мөртлөө зөв зохион байгуулалттай, зөв чиглэл рүү нэгэн амь, нэг бодол санаатай орж чаддаггүйгээс бид байрандаа л үлддэг. Ард түмнийг хагаралдуулдаг хүмүүс нь эрх мэдэлтнүүд. Түүхэнд ч бий. Их хэлмэгдүүлэлтийн 1937 онд энгийн залуугаар бууг нь шагайлгаж байгаад аав, ахыг нь ардын дайсан, Японы тагнуул гээд л буудуулж байсан. Ардыг ардаар нь. Эрх мэдэлтнүүдийн золиос ингэж хийгддэг. Дэлхийд ч гэсэн олон жагсаал цуглаанд цагдаа нараар ард иргэдийг буудуулдаг, баривчлуулж, зодуулдаг.
Цагдаа ч гэсэн ард иргэд шүү дээ. Нэг муу хүрэлцэхгүй хэмжээний цалин аваад, ноорхой гэрт амьдраад эрх мэдэлтнүүдийн золиос болсоор байна. “Чи ердийн хулгайч бол цагдаа чамайг барина, харин чи улс төрийн, том мөнгөний хулгайч бол цагдаа чамайг хамгаална” гэсэн үг хүртэл байдаг" хэмээн бичжээ.
.jpg)
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.