Охинтойгоо уулзах эцсийн хүслээ гүйцээж чадаагүй эмэгтэйн үхэл хоосон зүйл болж хувирав уу, Шадар сайд аа!
Шадар сайд С.Амарсайханы гэргий Ч.Ичинхорлоо ХӨСҮТ-ийн тусгаарлалтын бүс рүү дур зоргоороо орж гардаг тухай мэдээлэл өчигдөр оройноос хүчтэй шүүмжлэл дагуулав. Энэ цаг үед эрх мэдэлтний эрх "хатан" онцгой дэглэм зөрчин ХӨСҮТ-өөр "хэсч", бохир завааныг нь гайхан дуу алдаж "Буцаж гарна" гэж эмч, эмнэлгийн ажилтнуудыг баахан чирэгдүүлж байгаа явдлын дэргэдүүр хэн ч зүгээр өнгөрч чадахгүй.
Ялангуяа энэ цаг үед. Энэ бусармаг явдлыг дэлгэн асуусан сэтгүүлчийн өөдөөс муухай харан асуудлыг булзааруулан ээрч мууран түгдчих С.Амарсайхан даргаас бүр ч тод хариуцлага нэхэх ёстой. Дэглэмээ сахихгүй байна хэмээн ард түмнээ адлах хэрнээ дэлгүүр хэсч байгаа юм шиг халдварын голомтод гэр бүлийнхнээ эрх дураар нь тавина гэдэг огцорсон ч багадах асуудал биз.
Гэтэл амьдралынхаа сүүлийн жилүүдийг хорт хавдартай тэмцэж өнгөрүүлсэн эх сүүлчийн удаа охин үрээ харах хүсэл тээн эх орноо зорьж ирээд ХӨСҮТ-ийн хүйтэн хананы дотор цурхирч уйлсаар хорвоогоос хальж байна.
Олон сар, жилээр ээжээ санан бэтгэрсэн тэр бяцхан охин эргэлтийн жижиг цонхоор эхийнхээ бүлээн гарыг ч атгах эрхгүй байсаар хагацлаа. Ард түмэн амьдын там шиг өдрүүдийг өнгөрүүлж албан тушаалтнууд, тэдний хамаарал бүхий этгээдүүд хэмжээгүй эрхт хаад шиг авирлах эн тэнцвэргүй уг байдлыг монголчууд хэр удаан тэсвэрлэх бол.
Гадны орноос ирсэн нэгэн залуу бүсгүй мөн л аавыгаа эцсийн замд нь үдэх эрхгүй байгаадаа багтарч лайв хийн уйлж суухыг бид саяхан харсан. Улаанбаатар хот руу орж эмнэлгийн тусламж авч чадалгүй тарчилсаар бурхан болсон иргэнийг ч санаж байна. Нэг, хоёр, гурваар тогтохгүй. Маш олон хүн сүүлчийн ганц хүслээ гүйцэлдүүлж чадалгүй хагацаж, амьдын тамд тарчилж байгаа. Онцгой дэглэм хэмээх хөшигний ардаас цухуйсан цөөхөн кэйсийг эргэн сөхөхөд ийм зүрх зүсэм байна.
Харин хатагтай Ч.Ичинхорлоо төрийн хэргэмтэй нөхрийнхөө хүчээр жирийн иргэдэд хүсээд ч олддоггүй энэ эрхийг эдэлж бас "Заваан байна" хэмээн голж гоочилж, туйлж байгааг тэвчээд өнгөрч боломгүй. Эх, үрийн хагацлыг хараад эмгэнэл ч илэрхийлж чаддаггүй Шадар сайдын эрх хатан онцгой дэглэм зөрчин дураар авирлах нь хэр ёс зүйтэй үйлдэл вэ?
Сэтгэгдэл3
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.