УИХ-ын гишүүн М.Оюунчимэгийн хүү болох Б.Энхмөрөнг Төрийн албаны тухай хуулийг зөрчин Эрүүл мэндийн даатгалын сангийн Худалдан авалт, гэрээлэлтийн газрын даргаар томилуулсан явдалд гомдол гаргасан Баянзүрх дүүргийн иргэн А.Базарын өргөдөлд Төрийн албаны зөвлөлийн дарга Б.Баатарзориг хариу өгчээ.
Уг албан бичигт дурдсанаар "Эрүүл мэндийн даатгалын сангийн Худалдан авалт, гэрээлэлтийн газрын даргын албан үүргийг түр орлон гүйцэтгэгчээр Б.Энхмөрөнг Төрийн албаны тухай хууль тогтоомж зөрчиж томилсон талаарх мэдээллийн дагуу Хяналт, шалгалтын ажлын хэсэг байгуулан, нягтлан шалгах ажиллагааны явцад Эрүүл мэндийн даатгалын Ерөнхий газрын даргын 2021 оны 03 дугаар сарын 24-ний өдрийн Б/54 дүгээр тушаалаар Б.Энхмөрөнг ажлаас чөлөөлсөн болохыг үүгээр мэдэгдье." гэжээ.
Монгол улсын Төрийн албаны зөвлөлийн даргын өгсөн дээрх хариугаар бол Төрийн албаны тухай хууль тогтоомж зөрчсөн үгүйг тодорхойлоогүй ажээ. Яг шалгаад тогтоох гэхэд нь ажлаас нь чөлөөлчихөж. Тэгэхээр гэм буруутан байхгүй болж таарлаа. Эцсийн эцэст УИХ-ын гишүүн ээж нь тушаал гаргаагүй нь мэдээж. Гишүүн ээжтэй нялх сэнгүм нь ч өөрөө өөртөө тушаал гаргаж томилогдоогүй нь тодорхой.
Төрийн албыг ингэж хашихгүй ээ, Б.Баатарзориг дарга аа! Дээрээс нам чинь, дэргэдээс гишүүд чинь дарамтлаад байвал ажлаа өгөөд явах нь зүйтэй. Ажлаас чөлөөлсөн хүн нь Эрүүл мэндийн даатгалын Ерөнхий газрын дарга юм бол томилсон хүн нь ч нэг л байж таараа. Гишүүн, сайд, даргад үйлчилдэггүй хуулийг жирийн иргэдэд хэрхэн гуйвуулж, хүчээр үйлчлүүлсэн тухай мэдээллийг цаашид сурвалжлан хүргэх болно.
Зэрэг нэмэхийн өмнө...
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.