Б.Цогтгэрэл: "Бүх нийтийн үйлчилгээний үүргийн сан"-ийн шилэн данс нь маш БҮРХЭГ, ойлгомжгүй байгаа тул АТГ-т шалгуулах нь зүйтэй

Б.Цогтгэрэл буюу олон нийтэд “Шилэн Цогоо” гэдгээрээ танил болсон тэрээр ээлжит хяналт, шалгалтаа хийжээ.

Тэрбээр, "iT компаниуд "Бүх нийтийн үйлчилгээний үүргийн сан"-д 2020 оны жилийн эцсийн санхүүгийн тайлангаа ирүүл гэх бичиг надруу явууллаа.

Уг нь бол томоохон үүрэн телефоны операторууд, интернэтийн үйлчилгээ үзүүлдэг компаниудын цэвэр ашгийн 3% иар санхүүждэг санагдаад байх юм. Олон жилийн өмнөөс мэднээ энэ санг.

ХХЗХ-ны зардалд уг мөнгө зориулагддаг. Тийм ч учраас ХХЗХ цалин мөнгө сайтай гэдэг.

Хэт богино долионы станцуудын хяналт хийлгэдэг байсан учраас би энэ сангийн тухай ойлголт тодорхой хэмжээнд бий.

Гэтэл Шилэн дансыг нь хараад хэдэн сэтгэгдэл төрлөө. Та бүхэн өөрсдийн өнцөгөөс хүлээн аваарай.

1. 2020 онд 3,9 тэрбум төгрөг уг санд төвлөрсөн бололтой. Бололтой гэдэг нь Сангийн яамны баталсан Нягтлан бодох бүртгэлийн тайлан гаргадаг стандарт маягтаас өөр маягтаар тайлангаа бичсэн байх тул би сайн ойлгосонгүй.
2. Уг сан нь 1 ажилтантай 10 гэрээт ажилтантай бололтой.
3. Шилэн дансны хөтлөлт хийж байгаа нь сайшаалтай боловч гүйлгээний утга нь "гэрээний төлбөр" гэж ихэвчлэн байх бөгөөд энэ нь Шилэн дансны тухай хуулийн гүйлгээний утгыг тодорхой бичих заалтыг зөрчиж байна. Мөн гэрээ, төлбөрийн даалгавар зэргийг сканнердаж PDF болгон оруулах ёстой журмын заалтыг зөрчсөн байна.
4. Засгийн газрын тусгай сангуудад хяналт тавьдаг Аудитын дүгнэлтийг харах ёстой. Надад бол уг Шилэн данс нь маш бүрхэг бөгөөд оны эцсийн тайлан ойлгомжгүй байгаа тул уг санд мөнгө төвлөрүүлэх үүргээс татгалзаж АТГ-т шалгуулах нь зүйтэй гэж үзэж байна.
5. ХХМТГ-ын албан бланкаар Сангийн дарга нь албан тоот явуулсан нь мөн эргэлзээ төрүүлж байгаа бөгөөд индексийг нь шалгуулах нь зүйтэй юм. Тэгээд яахаараа ч Сангийн яамны Нягтлан бодох бүртгэлийн газарт биш ХХМТГ-т тайлангаа явуулах ёстой байдаг юм.

Авах дуртай юм бол Сангийн яамнаасаа л авна биз.

Хэрэв та уг санд мөнгө байршуулах үүрэг хүлээж байгаа бол эхлээд сайтар нягтал, өмнөх жилүүдийн тайланг нь нэхэж ав, зарцуулалтын төлбөрийн баримтуудыг нэг бүрчлэн үзэхийг зөвлөж байна.

Эдний албан бичиг, Шилэн данс 2-ыг хараад төрийн ажлын ямар ч ойлголтгүй Засгийн газрын тухай ойлголт, түүний шийдвэрийг огт мэддэггүй хүмүүсийн бөөгнөрөл шиг санагдлаа" хэмээн цахим хуудаснаа нийтэлжээ.