Авилга авч байгаад гардуулсан гэх У.Хүрэлсүхийн туслахын хэрэг ХЭРЭГСЭХГҮЙ болсон

Сод Монгол группын үүсгэн байгуулагчтай холбоотой мэдээллийг өчигдөр цахим орчинд Дандар баатарын зээ, МАН-ын гишүүн, балетчин бүсгүй Б.Сүндарьяа нийтэлж олны анхаарлыг татаад байна.

Сүнээ бүсгүйн нийтлэлд хэд хэдэн ноцтой зүйл бий. Тэрээр УИХ-ын эрхэм гишүүний талаар "УИХ-ын гишүүн болох гэж, ядаж л дэвших эрхээ авах гэж их ч хичээсэн дээ. Нэг л бүтдэггүй юм. "Өрсөлдөгчөө дарах гэж таван залуугаар Эрдэнэт хотод миний бүх шалдан нүцгэн зураг, манай намын дарга нартай авахуулсан зургийг маань эвлүүлж, дуу хоолой оруулж, цаг мөнгө заран байж захиалж хийлгүүлсэн хүн шүү дээ." "Үр хүүхдээ хүртэл бусдын гарт алдчихаад яагаад хүүхэд шигээ жаахан хүүхдүүдийг хайрладаггүй юм бэ?" гэжээ. Эдгээр мэдээллээс харахад энэ эрхмийг УИХ-д Булган аймгаас сонгогдсон Ц.Анандбазар гэж олон нийт таамаглаж байна.

Сүнээгийн "Таны мөнгө намд маань хэрэгтэй" гэсэн мэдээлэл "Ерөнхий сайд асан У.Хүрэлсүхийн хамаарал бүхий этгээд Сод Монгол компаниас 500 сая төгрөг авч байгаад гардуулсан." хэмээн УИХ-ын гишүүн асан Н.Номтойбаярын 2019 оны нэгдүгээр сарын 10-ны өдөр өгсөн ярилцлагатай нэгэн цэгт огтлолцож таарч байгаа нь тохиолдол уу.

Тэгвэл Н.Номтойбаярын нэр цохсон авлигын зуучлагч хэн бэ? гэдэг асуулт гарч ирнэ.

Ерөнхий сайд У.Хүрэлсүхийн туслах асан Н.Энхбаатар МИАТ ХК-ийн дэд захирлаар ажиллаж байхдаа "Сод Монгол" компанид давуу байдал үүсгэн, их хэмжээний авилга хээл хахууль авсан байж болзошгүй хэргээр 2018 оны долоодугаар сараас эхлэн АТГ-т шалгагдаж байгаад хэрэг нь өнгөрсөн оны хавар хэрэгсэхгүй болсон гэсэн мэдээлэл байдаг. 

Нямаа овогтой Энхбаатар нь ШШГЕГ-ын харьяа цагдан хорих 461 дүгээр ангид хоёр сар орчим саатуулагдсан. Тэрээр 2020 оны гуравдугаар сард МАН-ын Улстөрийн бодлогын хэлтсийн даргаар томилогдсон.

Н.Энхбаатар нь Хэнтий аймгийн гаралтай бөгөөд улстөрийн хүрээнд түүнийг намын дарга У.Хүрэлсүхийн туслахаар Шадар сайд байх үеэс нь хамт ажиллаж байсан, тун ойрын хүн нь гэх бий.