Дөнгөж сая БНХАУ-ын Синофарм үйлдвэрийн Вероселл вакцины эхний ээлжийн 300 мянган тун вакциныг хүлээн авлаа.
Өнөөдөр маргааш гурван удаагийн нислэгээр уг вакцины 900 мянган тунг хүлээн авах бөгөөд шууд худалдан авах гэрээгээр авч байгаа юм байна. Вакциныг шууд үйлдвэрээс нь авч байгаа бөгөөд 15 ам.долларын үнэтэй болохыг Сангийн сайд Б.Жавхлан мэдээллээ.
Тэрбээр вакцин хүлээн авах үеэр "Өнөөдөр, маргааш гурван удаагийн онгоцоор 900 мянган тун вакцин ирнэ. Үүнээс 7 хоногийн зайтай дахиад вакцин ирнэ. Эдгээрийг голомт болоод буй Улаанбаатар хотын иргэдийн хоёр дахь тун вакциныг хийхээс гадна нийслэлийн вакцинжуулалтад хамрагдаагүй насанд хүрсэн иргэдийг вакцинжуулна. Нөгөөдрөөс эхлэн нийтийг хамарсан вакцинжуулалт эхэлнэ. Нийт 130 орчим цэгээр вакцинжуулалтыг хийх бөгөөд энэ удаагийн вакциныг төлбөрийг нь төлөн авч байна. КОВАКС хөтөлбөрийн хүрээнд нийт насанд хүрсэн иргэдийн 60 хувийг вакцинжуулах вакциныг авахаар гэрээ хийсэн. Гэсэн хэдий ч энэ хөтөлбөрөөр авах вакцин 7-8-р сар хүртэл хойшилсон тул түүнийг хүлээлгүй наана худалдан авалтуудыг хийж байна. Тавдугаар сарын 10-н гэхэд Улаанбаатар хотын нийт иргэдийг нэгдүгээр тунд хамруулж дуусах бол зургадугаар сарын 10-н гэхэд хоёрдугаар тунг вакцинжуулна" гэлээ.
Эдгээр вакциныг БНХАУ-ын Синофарм үйлдвэрийн Вероселл вакциныг үйлдвэрээс нь шууд авч байгаа бөгөөд 15 ам.долларын үнэтэй. Төсөв амаргүй байгаа ч зохицуулалтыг хийж байгаа гэдгийг тэрбээр тодотгов. Худалдан авалтын төлбөр саадсан зүйлгүй гэдгийг тэрбээр мөн хэлж байна.
ОХУ-ын Спутник В вакцин худалдан авах гэрээг хийж, төлбөрөө шилжүүлсэн бөгөөд ирэх долоо хоногт эхний ээлжийн вакцинаа хүлээн авахаар байгаа юм байна. Сая хүртэл тун вакцин авахаар гэрээ хийжээ.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.