О.Цогтгэрэл: Намын гишүүд, дэмжигчдийн бидэн дээр ирж өлсгөлөн, суултад нэгдэе гэсэн хүсэлтийг хүлээж авахгүй байгаа
УИХ-ын гишүүн О.Цогтгэрэл: Суулт зарлаад 5 хонолоо. Ковидын нөхцөл байдал хүнд байгаа үед намын гишүүд, дэмжигчдийн бидэн дээр ирж өлсгөлөн, суултад нэгдэе гэсэн хүсэлтийг хүлээж авахгүй байгаа. Талбайд ирж бөөгнөрөл үүсгэх хэрэггүй гэж хэлж ярьж байгаа. Бүлгийн гишүүд л хариуцлагаа үүрнэ. УИХ-ын даргын санаачлагаар ажлын хэсэг гараад ажиллаж байгаа. Тодорхой үр дүн гарах байхаа. Бид бүхний ярилцаж байгаа асуудлын цаана Монгол улсад хуулийн хэм хэмжээ ямар байгаа вэ? Шударга ёс хангагдаж байгаа юу гэдэг асуудал бий. Бичигдээд гарчихсан хуулийн цаана улсын байцаагч нэртэй хүн тамгагүй, зөвхөн гарын үсэгтэй албан бланк үндэслэж тамга өгснөөс асуудал үүсч байгаа.
Хууль, шударга ёс, цар тахлын ард Монгол улсын гүйцэтгэх засаглалын түвшингийн асуудал ярих шаардлагатай болчихжээ. Бид дараа дараагийн удаад энэ бүхнийг гаргаж тавина.
Өчигдөр сөргөлдөж байгаа тал тодорхой саналтай уулзахаар ирлээ гэхэд тэдний болон талбайд цугларсан хүмүүсийн хооронд зөрчил үүссэн. ТЭСО-ийн ажилчин Э.Бат-Үүл дарга руу дайрсан үйлдэл гарсан. Миний хувьцаа эзэмшдэг байсан, үүсгэн байгуулсан компанийн 2000 гаруй ажилчид дотор ийм царай төрхтэй хүн олоогүй. Энэ асуудлыг хуулийн байгууллагад өгч шалгуулж байгаа. Энэ зургийг байршуулж, спонсор хийж түгээж байгаа сайт бий. Зохион байгуулалттай гүтгэлгийн үйл ажиллагаа явуулж байгаад харамсаж байна. Хуулийн байгууллагад хандсан.
Бид эв нэгдлийг хангаж, аль болох үймээн самуун гаргахгүй, зөрчил үүсгэхгүй, иргэдийг жагсаал цуглаанд уриалан дуудахгүй, сөргөлдөгч талтай ширээний ард суухыг байнга эрмэлзэж байгаа. Зохион байгуулалттай ийм үйл ажиллагаа явуулж, түүнийгээ бичиж аван олон нийтийн сүлжээгээр түгээж байгаад харамсаж байна.
МАН энэ бүх үйл ажиллагаанд оролцож байгаа нь харамсалтай байна. Өнгөрсөн оны төгсгөлөөр Монгол улсад улстөрийн нам үүсгэн байгуулсаны 100 жилийн ойг тэмдэглэн өнгөрүүлнэ гэхэд АН-ын бүлэг 100 хувийн саналаар УИХ-ын тогтоолын төслийг дэмжиж байсан. МАН-ын түүхэнд хэлмэгдэл гэх мэт олон зүйлүүд байсан ч гэсэн улстөрийн нам үүсэн байгуулсан ой гэдгийг бид бүхэн дэмжиж, хамтран тэмдэглэх ёстой гэж саналаа өгч байсан. Гэтэл МАН улстөрийн нэг багана болсон АН-ыг үгүй болгох гэж, парламент ёсны эсрэг үйл ажиллагаа явуулж байна гэж бид хардаж байна.
АН-д болж байгаа үйл явцыг энгийн үгээр тайлбарлахад, МАН-ын дарга М.Энхболд сонгуулийн үр дүнгээр хариуцлага хүлээгээд ажлаа У.Хүрэлсүхэд өгчээ. АН эрх баригч байж байгаад М.Энхболд дарга нь тамга ч үгүй нэг өргөдөл гаргангуут тамга хийж өгчихөөд, энэ танай намын л асуудал ш дээ, асуудлаа өөрсдөө шийдээч дээ гэж хэлээд зогсож байгаагаас ямар ч ялгаагүй. Айлын хашаанд түймэр тавьчихаад танай хашаан дотор л гал гарч байна. Бидэнд ямар хамаатай юм гэж хэлж байгаагаас ялгаагүй үйлдэл гэж үзэн эгдүүцэн хүлээж авч байгаа.
Бид бүхний тэмцлийн эцсийн зорилго хэн нэгнийг нэр дэвшүүлэх гэж анхнаасаа зориогүй. Хууль хэрхэн хэрэгжиж байна вэ, хууль бус олгосон тамга тэмдгийн асуудлыг нягталж шалгаж үзээч ээ, хууль, дүрэм журмын дагуу бүрдүүлсэн материалыг хүлээж аваач ээ гэсэн асуудал л тавьсан. Хууль бус зүйл ганц ч удаа яриагүй.
УИХ-ын гишүүн Д.Ганбат: Төрийн эрх барих дээд байгууллага УИХ дээр асуудлаа ярих гэсэн боловч боломж алга. Өнгөрсөн Баасан гаригт үдээс хойш Ерөнхий сайдын цаг байсан, чуулган хуралддаг өдөр. Гэвч хуралдсангүй. Найм дах удаагийн сонгуулийн үр дүнд байгуулагдсан парламентад Монгол улсын Ерөнхий сайд ерөөсөө орж ирсэнгүй. Өмнөх Ерөнхий сайд нь ч тэр, одоогийн Ерөнхий сайд ч тэр. Монгол улсад нэг намын дарангуйлал тогтчихжээ. Хэвлэл мэдээллийн байгууллага, МҮОНТВ татвар төлөгчдийн мөнгөөр цалинждаг байж, мэдээллийн тэнцвэртэй байдлыг хангахгүй байна.
АН-ын бүлгээс өчигдөр гадагшаа олон улсын байгууллага, гадаадын дипломат төлөөлөгчийн газруудад хандлаа. Хүний эрхийг дээдэлдэг, ардчилсан ёст парламенттай оронд парламент дээрээ үгээ хэлж чадахгүй байна, Монголын ард түмэн өдрөөс өдөрт дарангуйлалд автаж байна. Улсын дээд шүүх, СЕХ хараат бус байх ёстой. Төрийн байгууллагууд хэнээс ч хараат бусаар төрийн ажлыг хийх ёстой атлаа нэг намын үүрэг даалгавар биелүүлж ёсчилдог болсон нь харагдаж байна.
Ажлын хэсэг байгуулсан ч асуудлыг хуулийн хүрээнд шийдэх хүсэл эрмэлзэл байна уу? Хууль цагаан дээр хараар бичигдээд цаасан дээр үлдэх ёсгүй ээ. Хууль биелдэг байх ёстой. Үүний төлөө тэмлээ эхлүүлсэн. Ковидоор далимдуулан хүүхдүүд нь хоёр жил сургууль ч үгүй, Улаанбаатарынхан гэртээ хоригдоод, АН-ын бүлгийн үг хэлэх эрхийг хааж боогоод, Ерөнхий сайд нь ч чуулгандаа орж ирэхгүй, ард түмнээс сонгогдсон Ерөнхийлөгчөө үл тоомсорлосон үйл явдлууд болж байна. МАН хуваагдахаараа төрийн ажлыг бүтэн сараар тасалдуулж байсан.
СЕХ-ны шийдвэр яаж гарах нь хамаагүй. УИХ-д 13 суудалтай, бүлэг бүхий улстөрийн нам Монгол улсын Ерөнхийлөгчийн сонгуульд нэр дэвшүүлж чадахгүй байна. Эрх баригчдын захиалгаар нэр дэвшилт явагдлаа. СЕХ-ны дарга нь хуралдахаасаа өмнө биднийг бүртгүүлэхээр очиход л шийдвэрээ гаргачихсан сууж байсан.
.jpg)
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.