Ц.Туваан: Хөөрхий дөө, УИХ-ын дарга өрөөндөө оруулж, аяга буцалсан ус өгчихөөд зураг тавиад цай уулаа гэсэн байна билээ

УИХ-ын гишүүн Ц.Туваан: Хөөрхий дөө, УИХ-ын дарга өрөөндөө оруулж, аяга буцалсан ус өгчихөөд зураг тавиад цай уулаа гэсэн байна билээ

УИХ дах АН-ын бүлгийн ээлжит хурал төв талбайд боллоо

УИХ-ын гишүүн Ц.Туваан: Засгийн газрын 100 хоног, бидний өлсгөлөн 100 цаг болж байна. Бидний тэмцэл зөвхөн сонгууль байгаагүй ээ. Бид нэг намын дарангуйлал, төрийн байгууллага, Засгийн газрын дээр гарсан, улмаар парламентыг базаж хуралдуулах ч үгүй болгосон энэ бусармаг зүйлийн эсрэг тэмцэж байгаа. СЕХ нэр дэвшигчийг баталсан тогтоолоо ирүүлсэн. Монгол улсын Ерөнхийлөгч өнгөрсөн дөрөв дэх өдөр "Монгол улсын Ерөнхийлөгчийн тухай хуульд өөрчлөлт оруулах тухай" хуульд хориг тавьсан. Ерөнхийлөгчийн хоригийг УИХ хэлэлцээд, авсан өдрөөс нь хойш хэрэгжиж эхэлдэг. Хоригийг огт тоолгүй нэр дэвшигчийг бүртгэж байгаа нь хууль зөрчсөн үйлдэл. Хууль зөрчих нь хэвийн зүйл болсон л доо. Өөрсдөдөө хэрэгтэй хууль бол ярина, хэрэггүй бол зөрчөөд явчихдаг. Үндсэн хуулинд заасан "Монгол улсын нутаг дэвсгэрт сүүлийн таваас доошгүй жил тогтвор суурьшилтай амьдарсан" гэсэн заалт яагаад ч юм алга болсон. Үндсэн хуулинд байгаад байхад дагаж гарч байгаа бусад хуулинд нь байхгүй. Үүнийг та бүхэн цааш нь судалж үзээрэй. 

Та бүхэнд хэд хэдэн баримт үзүүлье.

Төрийн албан хэрэг хөтлөлтийн журмыг зөрчиж, Ардчилсан намын албан бланк ашиглаж, дугаар тавиад, хуучин дарга С.Эрдэнэ гарын үсэг зураад, тамгагүй бичгийг УБЕГ-т өгчээ. Хоёрхон хоногийн дараа улсын бүртгэгчийн дүгнэлт гарч, манай намын 20 жил ашигласан тамгыг хүчингүй болгосон. Маш хурдтай ажилласан. Бид бүхний тайлбарыг огт хэрэгсээгүй. Ердөө маргааш нь н.Бат-Очир гэж улсын бүртгэгч АН-ыг шинээр бий болоогүй байсаар байтал шинээр гэдэг нүдийг бөглөж, С.Эрдэнэд №9020 дугаартай тамга олгосон. Үрэгдүүлээгүй, гэмтээгээгүй, шинээр нам байгуулагдаагүй байсаар байтал ийм хууль бус үйлдэл хийснийг манай намын зүгээс гомдол гаргаж хуулийн байгууллагуудад шалгуулахаар хандаад байна.

Бидний гаргасан гомдлын дагуу 2021 оны хоёрдугаар сарын 21-ний өдөр Захиргааны хэргийн шүүх хуралдаж, С.Эрдэнэд хууль бусаар олгосон №9020 дугаартай тамгыг түдгэлзүүлсэн шийдвэр гаргасан. Энэ өдрөөс эхлэн энэ тамганы үйлчлэл хүчингүй гэдгийг эрүүл ухаантай л бол ямар ч хүнд ойлгогдохоор шийдвэр гарсан. Өнөөдөр Захиргааны хэгийн давж заалдах шатны шүүх хуралдаан 13.30 цагт хуралдахаар тов гарсан. Дахиад хүч түрж, шийдвэрээ гаргаад явах байх. С.Эрдэнэ энэ бүх хууль бус үйлдлийг хийж, шүүхийн шийдвэрийг үл тоомсорлон Монгол улсын Ерөнхийлөгчид нэр дэвшигч болсон. Энэ шударга ёс уу? Энэ зүгээр үү? Бид бүхэн энийг хараад зүгээр сууж байх ёстой юу? Энэ бүх шударга бус, хууль бус үйлдлийг зогстол бид тэмцлээ үргэлжлүүлнэ. 

УИХ-ын дарга Г.Занданшатар гарч ирж бидэнтэй уулзсаны дараа ажлын хэсэг байгуулья гэж ярьсан. Бид очиж байгаа. Ажлын хэсэг нь байгуулагдаагүй. Та хэд өлсгөлөнгөө зогсоочихооч, дотор орж ирээд ярилцаач гэхээс өөр зүйл ярихгүй байгаа гэдгийг хэлье. УИХ-ын гишүүд бид Монгол улсад хууль тогтоох, хууль хэрэгжиж байгаа эсэхэд хяналт тавих үүрэгтэй төр ард түмний гүүр. Энэ нийгмийн байгаа байдал цаашид даамжирвал дарангуйлал руу явчих нь ээ. Бид ийм байдалд хүргэхгүйн төлөө зорьж байна. Бидний амь нас, эрүүл мэнд үүний дэргэд юу ч биш. Бидний хүүхдүүд, үр хойч, ач зээ нар адгийн коммунист нийгэмд амьдарч байснаас бид хэд энд үхсэн ч яахав дээ, дуусталаа л тэмцэнэ. Бидний асуудал тийм сонин биш.

Хуулийн дагуу тэмцлийн дээд хэлбэрийг сонгоод л өлсөж байгаа. Эмч нар биеийн байдлыг өдөрт хоёр удаа ирж үзэж байгаа. Биднийг хоол унд идэж байгаа гэж хардаж, харлуулж байгаа хүмүүс байгаа бол ирээд хяналтаа тавиад байна биз. Бид  хоол унд гэсэн жижигхэн зүйлээр хөөцөлдөөд байх хүмүүс биш. Чин сэтгэлээсээ тэмцэж байгаа. Тэвчихийн аргагүй нөхцөл байдал үүсчихээд байгааг та бүхэн ойлгож байгаа биз дээ.

Бүгдийг нам захирч байгаагийн эсрэг тэмцэхгүй гээд яах билээ. Өлсгөлөн зарласан дөрөв дэх өдөр Адъяасүрэн гишүүний биеийн байдал муудаж, эмч нар өлсгөлөнгөө зогсоохыг шаардсан тул зогсоосон. Бусад гишүүд эрүүл мэндийн үйлчилгээ аваагүй. Юм идэж уулаа гээд байгаа асуудал бол, хөөрхий дөө УИХ-ын дарга өрөөндөө оруулаад аяга буцалсан ус өгчихөөд тэрнийхээ зургийг тавиад  цай уулаа гээд байна билээ. Бид тэгдэг эрчүүд биш. 2019 оны цагаан сараас эхлэн бүгдийг хорьж, яагаа ч үгүй байхад сүржигнээд дайны байдалд оруулсан. Энэ бүхний ард сонгууль л байсан. У.Хүрэлсүх эх орондоо сүүлийн таван жил амьдарсан үгүйг ХХЕГ-аас лавлагаа авч тодруулах хэрэгтэй.