МЭК судалгааны байгууллага 2021 оны 7 дугаар сарын 20-22-ны өдрүүдэд олон нийтийн дунд явуулсан судалгааны дүнгээ танилцууллаа. Тус судалгааг иргэдэд үйл ажиллагаа нь таалагддаггүй улс төрч, таалагддаг улс төрч, улсын их хурал, засгийн газар, ерөнхийлөгчийн үйл ажиллагааны үнэлгээ сэдвүүдийн хүрээнд хийжээ.
Судалгааны танилцуулгыг үйл ажиллагаа нь иргэдэд таалагддаггүй болон таалагддаг улс төрчийн авсан саналыг хувьд шилжүүлэн 2021 оны 1 дүгээр сараас 7 дугаар сарын хугацаанд шугаман графикаар үзүүлсэн байна.
Үйл ажиллагаа нь таалагддаггүй улс төрчийг тодруулахад: 2021 оны 1 дүгээр сарын байдлаар иргэд таашаахгүй улс төрчдөөрөө С.Эрдэнэ, Д.Сумъяабазар, У.Хүрэлсүх, Г.Занданшатар, П.Анужин, Ц.Нямдорж нарыг эрэмбэлж байв. Харин 6 дугаар сарын байдлаар С.Эрдэнэ 36%-ийн саналаар жагсаалтыг тэргүүлсэн хэвээр, түүний араас шадар сайд С.Амарсайхан 22%, Ерөнхийлөгч У.Хүрэлсүх 17%, Ерөнхий сайд Л.Оюун-Эрдэнэ 15%-ийн саналаар иргэдийн дургүйцлийг төрүүлж байгаа улс төрчөөр эрэмбэлэгдэж байжээ.
Сарын дараа буюу 7 дугаар сард АН-ын дарга асан С.Эрдэний санал 20% болж буурсан бол Ерөнхийлөгч У.Хүрэлсүх 17% саналтай хэвээр байна. Энэ сард иргэдийн дургүйцлийг төрүүлж байгаа улс төрчдийн эгнээнд УИХ-ын дарга Г.Занданшатар 15%-ийн саналаар нэмэгдэн орж ирсэн ба Ерөнхий сайд Л.Оюун-Эрдэний санал 13%, Шадар сайд С.Амарсайханы санал 7% болж буурчээ.
Судалгааны энэ хэсгээс харахад он гарснаас хойш иргэдийн дургүйцлийг тасралтгүй төрүүлж байгаа улс төрчөөр АН-ын дарга асан С.Эрдэнэ, одоогийн Төрийн тэргүүн У.Хүрэлсүх, Улаанбаатар хотын захирагч Д.Сумъяабазар нарыг нэрлэж болохоор байна.
Хачирхалтай нь иргэдийн хамгийн дургүй улс төрчдийн хоёрдугаарт нэрлэгдэж байсан Ерөнхийлөгч У.Хүрэлсүх иргэдэд таалагддаг улс төрчдийн жагсаалтыг ч мөн тэргүүлсэн байна.
Судалгааны үйл ажиллагаа нь таалагддаг улс төрчийг тодруулахад 2021 оны 1 дүгээр сард Ерөнхий сайдаар ажиллаж байсан У.Хүрэлсүхийн рейтинг хамгийн өндөр буюу 33% байв. Түүний араас тухайн үед Ерөнхийлөгчөөр ажиллаж байсан Х.Баттулга 27%-ийн рейтингтэй удаалж байсан бол С.Ганбаатар, Н.Алтанхуяг нар 15-16%-ийн рейтингээр 3, 4-т эрэмбэлэгдэж байв.
У.Хүрэлсүхийг Ерөнхий сайдаас огцорсны дараа рейтинг нь тасралтгүй унасаар 4 дүгээр сард 23% болсон. Гэсэн ч сонгуулийн саруудад эргэн өсөж 30%-д хүрчээ.
Харин 2021 он эхлэхэд 5%-ийн рейтингтэй байсан Л.Оюун-Эрдэний үзүүлэлт 2 дугаар сард 35% болж огцом нэмэгдсэн ч 6 дугаар сарыг хүртэл тасралгүй унасаар байв.
Судалгааны хугацаанд рейтинг нь тогтвортой өссөн улс төрчөөр Х.Баттулга, Н.Алтанхуяг нарыг нэрлэж болох юм. Ерөнхийлөгч асан Х.Баттулгын рейтинг 2021 он гарахад 27% байсан бол аажим өссөөр сонгуулийн саруудад 31%-д хүрч рейтингээрээ нэгдүгээрт эрэмбэлэгдэж байжээ.
Х.Баттулга Ерөнхийлөгчийн үүргийг У.Хүрэлсүхэд шилжүүлэн өгсөн 7 дугаар сард түүний рейтинг 25% болж буурсан бол У.Хүрэлсүхийн рейтинг 32%-д хүрч нэмэгдсэн байна.
Ерөнхий сайд асан Н.Алтанхуягийн рейтинг 1 дүгээр сарын байдлаар 15% байсан бол 7 дугаар сард 18 болж өссөн байна.
Сэтгэгдэл30
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.