Ази тивийн аварга шалгаруулах тэмцээн, Азийн олимпын эрх олгох тэмцээнүүдэд оролцсон чөлөөт бөхийн шигшээ багийнхнаас КОВИД-19-ийн халдвар илэрчээ.
Шигшээ баг энэ сарын 07-ны Казахстан улсыг 43 хүний бүрэлдэхүүнтэй зорьсон ба олимпын эрхийн болон Ази тивийн аварга шалгаруулах тэмцээнд амжилттай оролцсон.
Болгарын Софи хотод тавдугаар сарын 06-09-нд болох олимпын эрхийн сүүлийн боломж тэмцээнд оролцох 5 тамирчин Казахстанд үлдээд бусад 35 тамирчин, шүүгч, багш, албаны хүмүүс эх орондоо ирээд тусгаарлалтад тав дахь өдрөө болж байна.
Шигшээ багийнхан Алматы хотод байх хугацаанд 2-3 удаа шинжилгээнд хамрагдсан ба дөрөвдүгээр сарын 21-ний өдөр буюу ирэхээсээ хоёр өдрийн өмнө шинжилгээ өгч сөрөг гэсэн хариу аваад тусгай үүргийн онгоцонд суужээ.
Харин Монголд ирээд тусгаарлах байранд өгсөн шинжилгээгээр хэд хэдэн тамирчдын хариу эерэг гарсан бөгөөд тамирчдын биеийн байдал хэвийн ил шинж тэмдэг байхгүй хөнгөн хэлбэрийн шинжтэй байна гэж Чөлөөт бөхийн холбооноос мэдээллээ.
Казахстаныг зорихоос өмнө буюу гуравдугаар сарын 10-ны өдөр бүх тамирчид вакцины 1-р тунг хийлгэсэн байсан юм.
Тэмцээнд оролцсон Япон, Өмнөд Солонгос, Киргиз, Ираны тамирчдаас мөн халдвар илэрсэн бол Казахстанд үлдсэн шигшээ багийн тамирчдын хариу сөрөг гарсан байна.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.