Н.Ганибал: Гурван хувийн хүүтэй, 200 тэрбум төгрөгийг малчдад зээлээр өгнө гэсэн. Одоо хүртэл шийдлээ гаргаагүй
Арван их наяд бол улсын төсөвтэй холбоотой, хууль гарах ёстой. УИХ-ын гишүүдэд сонсгосон болгоод өнгөрөх гэж байх шиг байна. АН-ын бүлгээс тодорхой асуудлуудыг тавиад байгаа. У.Хүрэлсүхийн Засгийн газар 2019 онд 5,1 их наядын хөтөлбөр гэсэн сүржин нэртэй хөтөлбөр хэрэгжүүлсэн. Гурван том асуудал тавсан. 1-рт, Ковид дотооддоо алдахгүй гэсэн. Алдчихсан. 2-рт, Эдийн засгаа хамгаална гэсэн. Эдийн засаг 2020 онд 5,3 хувиар буурч, хасах руу орсон. 3-рт, Ажлын байраа хамгаална гэсэн. Дөрвөн зуун мянган ажлын байраа алдчихсан.
Одоо 10 их наяд гээд ярьж байна. Тухайн үеийн У.Хүрэлсүхийн Засгийн газар сайдуудаа суулгаад яг ийм байдлаар ярьж байсан. Өнөөдөр 5,3 их наядын хариуцлагын асуудлыг хэн ч хүлээсэнгүй. Хэн энэ хариуцлагыг үүрэх вэ? Тэр их мөнгө хаана байна. Арван их наядын хөтөлбөрт мэргэжилтэн бэлдэнэ гэснээ больж байх шиг байна. Гурван хувийн хүүтэй, 200 тэрбум төгрөгийг малчдад зээлээр өгнө гэсэн. Одоо хүртэл шийдлээ гаргаагүй. Сүржин нэртэй хөтөлбөр ярихаасаа бодит үнэнийг ярья.
Банкны систем болохоо больчихлоо. Энэ мөнгийг эдийн засагт гаргахгүй бол Монгол улс элгээрээ хэвтэх гээд байна гээд асуудлаа тодорхой ярьмаар байна. Гоё гоё нэр өгөөд үр дүнгүй, хариуцах эзэнгүй асуудал их байна. Ард түмэнд өгөх 300000 төгрөгийг МАН-ын гишүүд маань уриа лоозон болгож, бахдалтай, баяр баясгалантай ярьж байна л даа. Сая Н.Алтанхуяг гишүүн тодорхой хэллээ. Энэ мөнгө бол зээл юмаа.
Өнөөдөр Монголын иргэн бүхэн 300000 төгрөгийн зээл нэмлээ гэдгийг та бүхэн албан ёсоор хэлчих хэрэгтэй. Оюутолгой компанийн балансад зээл хэсэгт энэ мөнгө бичигдээд явж байгаа шүү. Арбитрийн шүүхийн шийдвэр манай талд гарах хүртэл бид өртэй гэдгээ хэлэх хэрэгтэй. Ард түмнийг хуурах нь хэрэггүй.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.