Д.Өлзийбаатар: Төрийн бүх удирдагчид, албан хаагчид түүх бүтээгчид, түүхэнд нэр орж явах хүн гэдгээ сайн санаж явах ёстой юм. Монголчууд түүхэндээ хэнэггүй ханддаг, үл тоодог, түүхийг тэгж байгаад сурчихна гэж боддог. Түүхэндээ эргэлзэнгүй ханддаг, шүүмжилдэг. Яагаад гэвэл, Монголчууд дэлхийн түүхэнд хоёр гурван удаа долгион үүсгэж байсан баялаг түүхтэй ард түмэн.
Аливаа ард түмэн түүхээ тулж, сэрж, өндийдөг. Түүх нь өөрөө сургамжийг, юу болж өнгөрснийг, яах ёстойг хэлж өгдөг. Ер нь төр баригчдын ширээний ном "МОНГОЛЫН ТҮҮХ"-ийн ном байх ёстой. Тэрнээс биш гадны сургаал онол биш. Гадны онолчдын бодлого номлол биш Монголын өөрийнх нь туулж ирсэн улс орных нь түүх байх ёстой. Тэгэхээр түүхээ ойлгохгүй, судлахгүй, үйл явдлаас сургамж авахгүй, өөрийн бие дээр хэрэгжүүлж чадахгүй байгаа учраас Монголд давтагдсан хямралууд тохиож байгаа юм.
Бусдын үгээр үг хийх алдаа дутагдлууд их гарсан. Яг одоо энэ үйл явц давтагдаж байна. Нэг нэгэндээ үл итгэх явдал Монголчуудыг сүйрэл, гутралд хүргэж байсан. Үр дүнд нь Манжийн эрхшээлд орсон. Хамгийн сүүлийн жишээ хэлэхэд, Ерөнхий сайд асан У.Хүрэлсүхийн гаргасан үйлдэл байна. Ерөнхий сайд гэнэт ажлаа өгөөд, Ерөнхийлөгч рүү янз бүрээр улс төрийн довтолгоо хийчихээд яваад өгсөн. Түүхч хүний хувьд энэ үйлдлээс хагарлын эхийг тавьж байгааг харж байна. Ерөнхийлөгч, УИХ-ын дарга, Ерөнхий сайд гурав бол ҮАБЗ-ийн тулгын гурван чулуу. Энэ гурвын дунд ямар ч хор гүйх ёсгүй. Түүхэн дэх сургамжуудыг огт хараагүй. Дараагийн үүсэх нөхцлийг огт тооцоогүй үйлдэл хийсэн нь харагдаж байна. Өнгөрсөн нэг сараас хойшхи байдлыг ажихад улс орон бүхэлдээ талцал хуваагдлын их үер рүү орсон нь харагдаж байна.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.