Өсвөр насны эрэгтэй хүүхдүүд бүлэглэн нэгнийгээ зодож, тархи руу нь өшиглөж байгаа сэтгэл эмзэглүүлэм бичлэг өнгөрсөн зургаадугаар сард цахим орчинд цацагдсан.Бичлэг гарсны дараа ЦЕГ-аас энэ хэргийг шалгасан бөгөөд зодуулсан хүүхдийн эрүүл мэндэд ямар хохирол учруулсныг Шүүх шинжилгээний үндэсний хүрээлэн тогтооно гэж ЦЕГ-аас тухайн үед мэдээлж байв.
Бичлэгийн дагуу нийслэлийн Баянгол дүүргийн цагдаагийн Нэгдүгээр хэлтсээс Мөрдөн шалгах ажиллагаа явуулжээ. Уг хэрэг 2022 оны гуравдугаар сарын 9-ний өдөр Баянгол дүүргийн 11 дүгээр хорооны нутаг дэвсгэр дэх 12 дугаар байрны гадаах Тоглоомын талбайд болсон бөгөөд 16 настай Б, Г нар найз охинд нь мессеж бичсэн гэх шалтгаанаар 16 настай М-г бүлэглэн зодож танхайрсныг тогтоосон. Энэ хэрэгт холбогдогч нарыг эрэн сурвалжлан олж, мэдүүлэг авсан тухай бид мэдээлж байв.
Шүүх шинжилгээний дүгнэлт ямар гарсан болон танхайрсан хүүхдүүдэд ямар хариуцлага тооцсоныг ЦЕГ-аас тодруулахад, Шүүх шинжилгээний үндэсний төвөөс “Зодуулсан хүүхдэд гэмтлийн зэрэг тогтоогдоогүй” гэсэн дүгнэлт гарсан тул уг хэргийг Зөрчлийн хуульд зааснаар торгох шийтгэл оногдуулахаар шийдвэрлэсэн. Хэрэв эрүүл мэндэд хохирол учирч, гэмтэл тодорхойлогдсон бол хэргийг Эрүүгийн хуулиар шийдвэрлэх эрхзүйн нөхцөл үүснэ.
Энэ хэргийг шалган шийдвэрлэсэн байцаагч ээлжийн амралтаа авсан бөгөөд хэргийг шалган шийдвэрлэсэн материалаа Баянгол дүүргийн прокурорт хянуулахаар хүргүүлсэн байна гэв.
Жич: Уг зодоон 2022 оны гуравдугаар сарын 9-ний өдөр болсон ба бичлэг үүнээс гурван сар гаруйн дараа буюу зургаадугаар сарын 20-ны өдөр цахим орчинд цацагдсанаар ил болж, хэргийг шалгах ажил эхэлсэн юм.
.jpg)
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.