“G7”-гийн орнуудын (АНУ, Канад, Герман, Франц, Итали, Япон, Их Британи) Гадаад хэргийн сайд нар сүүлийн хоёр жилд анх удаа нүүр нүүрээ харан уулзах гэж байна.
Энэ удаагийн уулзалтаар коронавирусийн цар тахал, дэлхий нийтэд учирч буй аюул, уур амьсгалын өөрчлөлт, ОХУ-тай хийж буй хамтын ажиллагааны талаар голчлон хэлэлцэх юм байна. Сайд нарын нэгдсэн хурал Лондон хотноо өнөөдөр болон маргааш болох бөгөөд уулзалтын эхний өдөр хоёр талын уулзалтууд болно.
Цар тахлын нөхцөл байдалтай холбогдуулан уулзалтын үеэр шаардлагатай аюулгүй байдлын арга хэмжээг авч, уулзалтад оролцогчдыг “COVID-19”-ийн шинжилгээнд тогтмол хамруулах аж.
Уулзалтад Их Британи, Герман, Итали, Канад, АНУ, Франц, Японы Гадаад хэргийн сайд нараас гадна Европын холбооны Гадаад харилцаа, аюулгүй байдлын бодлогын дээд төлөөлөгч Жозеп Боррель, Австрали, Энэтхэг, БНСУ, ӨАБНУ-ын төлөөлөгчид, мөн АСЕАН-ы Ерөнхий нарийн бичгийн дарга Лим Жок Хой оролцох юм байна.
Их Британийн Гадаад хэргийн сайд Доминик Рааб "Дэлхийн өнцөг булан бүрт вакцины хүртээмжтэй байдлыг хангах, охидын боловсролын түвшинд анхаарах, уур амьсгалын өөрчлөлтийн эсрэг амбийцтай арга хэмжээ авах, өлсгөлөнгөөс урьдчилан сэргийлэх зэрэгт чиглэсэн арга хэмжээ авах болно" гэв.
Тэрбээр мөн “G7” буюу “Долоогийн бүлэг”-ийн орнууд хөгжиж буй орнуудын охид, эмэгтэйчүүдийн боловсролд зориулж ирэх хоёр жилийн хугацаанд 15 тэрбум ам.доллар гаргахаар төлөвлөж байгаа тухай мэдэгдсэн байна.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.