Өмнөд Солонгосын Ерөнхийлөгчийн Тамгын газраас хоёр Солонгосын удирдагчид итгэлцлээ сэргээж, харилцаа холбоогоо сайжруулахаар тохиролцсон болохыг мэдээлэв. Тэд 4 дүгээр сараас хойш хэд хэдэн хувийн захидал солилцсон гэж мэдэгдэлд дурдав.
Харин Хойд Солонгосын албан ёсны KCNA мэдээллийн агентлагаас " Удирдагчид харилцан итгэлцлээ сэргээж, эвлэрлийг дэмжих чиглэлээр томоохон алхам хийхээр тохиролцсон. Дээд удирдагчдын хооронд байгуулсан гэрээний дагуу 7-р сарын 27-ны өдрийн 10:00 цагаас эхлэн хоёр Солонгосын хоорондын харилцаа холбооны бүх шугамыг дахин ажиллуулах арга хэмжээ авсан" гэж мэдээлсэн байна.
Хоёр талын төлөөлөгчид гурван минутын турш утсаар ярьсан байна. Нэмж дуудлага хийх ажлыг мягмар гарагийн үдээс хойш, цааш нь өдөр бүр хийхээр болжээ.
2018 онд Өмнөд Солонгосын Ерөнхийлөгч Мүн Жэ Ин, Хойд Солонгосын удирдагч Ким Жон Ун нар гурван удаа уулзалт хийж хоёр улсын хоорондын харилцаа сайжирсан. Гэсэн ч Хойд солонгосын удирдагч Ким Жон Ун, АНУ-ын Ерөнхийлөгч Дональд Трамп нарын хоёр дахь дээд хэмжээний уулзалт нуран унасны дараа хоёр солонгосын харилцаа маш хурдан муудсан байна.
Улмаар Хойд Солонгос 2020 оны 6 дугаар сард Өмнөд солонгосоо харилцаагаа тасалсан юм. Түүний дараа Хойд Солонгосын талаас хоёр Солонгосын харилцаа холбоог сайжруулах зорилгоор барьсан Солонгос хоорондын хилийн албыг дэлбэлжээ.
"Жил гаруй хугацааны дараа дахин ярилцаж байгаадаа бид баяртай байна. Энэ нь бүх солонгосчуудад сайн мэдээ дуулгах болно гэж найдаж байна" Өмнөд Солонгосын талаас хийсэн мэдэгдэлд дурдсан байна.
Эх сурвалж BBC.com
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.