АН-ын дотоод зөрчил саваа хальж, төрийн хямрал болтлоо дэвэрсэн хүндхэн өдрүүд өнгөрч байна. АН тэр чигтээ зайлаасай, балиар юмнууд, хохь чинь гэж харааж суухдаа таны, миний, Монгол минь хамт хараагдаж байгааг ойлгох хэрэгтэй.
АН-ын гишүүн, дэмжигч мөн эсэхээс үл хамаарч Монгол улсын тусгаар тогтнол, бүрэн бүтэн байдалд энэ намын гүйцэтгэх үүрэг, хүлээх хариуцлага уяатай гэдгийг санаж, хүн бүр оролцохоо байг гэхэд санаа тавих болсон нь үнэн.
АН-ын дотоод зөрчилд бид оролцоогүй хэмээн МАН-ын зүгээс АН-ын даргын сунгааг орон даяар явуулах үйл явцтай зэрэгцэн мэдэгдэл гаргаж байна билээ. Өмнө нь, өмнө нь ч гэж дээ, Ц.Элбэгдоржийн үеэс Ардын нам АН-ын хэрэгт далдуур нөлөөлж, ханцуй дотор наймаа явагддаг байлаа. Одоо харин нөгөө цайрна гээч нь болсон нь нууцгүй үнэн. Шөнийн хоёр цагт УБЕГ-ын ажилтныг дуудаж ажиллуулан, Ардчилсан намын 21 аймаг, нийслэл, есөн дүүргийн намын тамга, тэмдгийг хүчингүй болгосон. Хүчин төгөлдөр хэрэглэж байсан тамга тэмдгийг “оптоор” нь хаягдаж, үрэгдүүлсэн хэмээн хүчингүй болгох "эрх мэдэл, эрх ашиг" хэнд бий вэ?
АН-ыг унагаж аваад, дэвсэлж суух нь нэг хоёр удаагийн сонгуулиар ашгаа өгч болох ч алсдаа өөрсдөө ч дийлэхээргүй үр дагавартай нүүр тулбал яах вэ? Ирэх Ерөнхийлөгчийн сонгуульд АН-ыг оролцуулахгүй байх санаа, шийдэл та нарт бий. Тийм ээ, болох л санаа. Яагаад болохгүй гэж. АН арчаагүй байна, аргаа барж байна. Гэхдээ та нар нэг зүйлийг андуураад байна. Ард түмэн АН-аас ч, бас МАН-аас ч залхсан, жигшсэн шүү.
Өчигдөр шинээр сонгогдсон АН-ын дарга О.Цогтгэрэлийг батламжлах Их хурал Дүнжингарав худалдааны төвийн гадаа болсон бөгөөд хуралд 1400 орчим гишүүд оролцжээ. Шадар сайд С.Амарсайхан: "Ардчилсан намын ээлжит бус чуулганыг зохион байгуулж, олон хүнийг нэг дор хамруулсан үйл ажиллагаа явуулсныг шаардлага хүргүүлж таслан зогсоов... АН-ын удирдлагуудыг хууль хяналтын байгууллагад шалгуулахаар шилжүүллээ." гэв.
Тэгээд энэ нам яах байсан юм бэ? Цахимаар хуралдаж үзсэн. Дүрмийн бус гээд Дээд шүүх бүртгэж аваагүй. Хүний өөрийнгүй булшны нүхийг нь ухаад дайрч байна. Нэгэн цагт хувьсгал хийж, төр эргүүлж явсан намыг булшлах гэж МАН аагаа багтааж, АН харин гарц эрж, арга хайж байна. Ямартаа ч Их хурлаа хийж, даргатай болоод авлаа.
МАН 100 жилийн түүхт ойгоо нижгэр тэмдэглэж өнгөрөөсөн нь ердөө ганцхан сарын өмнөх үйл явц. Тэр мөчөөс эхлэн цар тахал цараагаа яажшуухан тэлснийг “тоо” хэлээд өгөх байх.
Баярын хурал, ойн концерт, хүлээн авалт, ойн медаль, гарын бэлэг гээд МАН-ын 100 жилийн ой одоо ч намын анхан, дунд шатандаа үргэлжилсээр л байна. “Хүүхэд ч болов зодчихоод унтая” гэгчээр эрх баригчид АН-ын Их хуралд хүчийг үзүүлж, ТАРААВ.
Гэрэл байдаг болохоор л сүүдэр оршин тогтнодог юм шүү.
Сэтгэгдэл0
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.