Соёлын сайд Ч.Номин Л.Оюун-Эрдэнийн Засгийн газарт хамгийн залуу, эмэгтэй сайд болж ирэхдээ л том бүдэрчихээд орж ирсэн. Төрийн тангараг өргөнө гэдгээ мэдсээр байж үс гэзэг нь сэгсийсэн, алцайгаад суучихсан, бас болоогүй ёсолчихсон хэмээн олны зэвүү дургүй хоёрыг зэрэг хүргэсэн. Тухайн үед үнэхээр айлын эрх “эхнэр” шиг харагдаж байсан ч залуу хүн сурах биз дээ хэмээн зөөлөрч байлаа.
“Бүгд Найрамдах Энэтхэг улсаас Монгол Улсад суугаа элчин сайд М.П.Сингх болон Соёлын сайд Ч.Номин нар Богд хааны ордон музейн төв хаалга, гол сүмүүдийг сэргээн засварлахаар болж, шаардлагатай хөрөнгө оруулалтыг хоёр тал хамтран шийдвэрлэх талаар санал солилцлоо.” гэсэн Соёлын яамны албан ёсны мэдээний доор Ч.Номин сайдын Элчин сайд М.П.Сингх, албаны бусад хүмүүсийн хамт авахуулсан зураг нийтлэгджээ.
Дөрөвдүгээр сарын 9-ний Баасан гаригт. Баасан гариг хэмээн онцолсны учир нь энэ өдөр ажлын өдөр таарч байгааг л сануулах гэсэн хэрэг. Яасан хаширдаггүй, алдаанаасаа сурдаггүй сайд вэ?
Энэ зураг дээрх “Burberry” брэндийн шаахайг чөлөөт хувцас дээр өмсдөг болохыг өндөр боловсролтой бүсгүй мэдэхгүйдээ биш, мэдэн будилж өмссөн болж таарах гээд байна. Ч.Номин гэж эмэгтэйг Монголчууд л “Гачууртын Чинбатын охин” гэхээс дэлхий таныг “Монгол улсын сайд” гэж хардаг гэдгийг сануулья.
Дээрх зүй зохисгүй хувцаслалтыг нийгмийн сүлжээнд олноороо шүүж, шүүмжилж, талцаж байх зуур зураг дээрх ооч сахалтай, этгээд үстэй залууг Ч.Номин сайдын бие хамгаалагч гэсэн мэдээлэл гарч ирсэн. Энэ мэдээлэл үнэн бол таны бие хамгаалагчтай байх эрхийг чинь хүндэтгэж байгаа ч, ”төр төмбөгөр ёс ёмбогор” гэсэн үгийн утгыг ухаж, бие хамгаалагчаа зохих байранд нь тавина уу.
Соёлын яамны албан ёсны цахим хуудаст элчин сайдууд болон салбарын төлөөлөлтэй уулзлаа, санал солилцлоо гэсэн мэдээлэл олдсоноос бодлогын чанартай шийдвэр ганцыг ч олж уншиж чадсангүй ээ.
Соёлын яамны албан ёсны сайтад тавигдсан https://moc.gov.mn/ шуурхай утас 51265622 дугаар руу бүтэн долоо хоногийн турш залгаад ганц ч удаа холбогдож чадаагүйгээ ташрамд хэлье.
За яахав, тэгж байгаад сурна гэсэн юм төрд байдаггүй юм аа. Төрийн алба, төрийн албан хаагчид салбарын сайд, удирдлагынхаа ажлын арга барил, хувийн зохион байгуулалтыг анаж, ажиж байгаад, яг түүнд нь тохируулж ажиллахаа мэддэг “SMART” гэдгийг нөхөрсгөөр зөвлөе.
Сэтгэгдэл17
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.