Монголын Ардчилсан холбооны Удирдах зөвлөлөөс УИХ-ын дарга Г.Занданшатарт шаардлага хүргүүллээ

Монголын Ардчилсан холбооны Удирдах зөвлөлөөс УИХ-ын дарга Г.Занданшатарт шаардлага хүргүүллээ.

МОНГОЛ УЛСЫН ИХ ХУРЛЫН ДАРГА Г.ЗАНДАНШАТАР ТАНАА

ШААРДЛАГА

Монгол Улсын Үндсэн хуулийн цэцийн гишүүн Д.Одбаяр нь 2019 оны 10 дугаар сарын 31-ний өдөр БНСУ-д онгоцны үйлчлэгчийн биед зүй бусаар халдан бэлгийн дарамт учруулсан гэх хэргийг БНСУ-ын хуулийн байгууллага шалгаж, 7 сая воны торгуулийн ял оногдуулсныг өөрөө хүлээн зөвшөөрсөн билээ. Д.Одбаярын хувьд гэмт хэрэг үйлдсэн нь БНСУ-ын хуулиар тогтоогдсон гэж үзэж болно. Энэ тохиолдолд Монгол Улсын Их Хурал, тэр дундаа дарга Г.Занданшатар та Цэцийн тухай хуулийн 5 дугаар зүйлийн 3-д зааснаар Д.Одбаярыг эгүүлэн татах асуудлыг хөндөх үүрэгтэй атал даргаас чөлөөлсөн төдий аргацаан хариуцлага хүлээлгэх ямар ч алхам хийсэнгүй өдий хүрлээ.

Үндсэн хуулийн цэц өөрөө Үндсэн хуулийн хямрал өдөөх, УИХ-аас баталсан хуулийг биш батлаагүй хуулийг батлах байсан хэмээн маргаан үүсгэхээр эрх баригч МАН улайрах, гэмт хэргээрээ барьцаалагдсан Д.Одбаяр гол дүрд тоглох зэргээр үндсэн хуульт байгуулалд улс төрийн өчүүхэн эрх ашгаар халдаж байхад Г.Занданшатар Та хамсаатан нь мэт нүдэн балай чихэн дүлий эвлэрэх ёсгүй.

БНСУ-д гэмт хэрэгт шийтгэгдсэн Д.Одбаяр Монгол Улсын Үндсэн хуулийн цэц маргаан хянан шийдвэрлэхдээ хуралдааныг хуульд тусгайлан зааснаас бусад тохиолдолд илээр, шууд, тасралтгүй явуулах зарчмыг санаатай гажуудуулсан нь түүнийг эгүүлэн татах хангалттай үндэслэл бөгөөд шударгаар шийдвэрлэх эсэх нь түүнийг дэвшүүлсэн УИХ, УИХ-ын дарга Танаас шууд хамаарна. Монголын Ардчилсан Холбоо 1992 оны шинэ Үндсэн хууль батлагдах нөхцөл бүрдүүлсэн хүчнийхээ хувьд хууль тогтоох төрийн эрх барих дээд байгууллага Үндсэн хууль зөрчихийг хэрхэвч зөвшөөрөхгүйгээ мэдэгдэн Үндсэн хуулийн цэцийн гишүүн Д.Одбаярыг эгүүлэн татах асуудлыг нэн даруй хэлэлцэн шийдвэрлэхийг Танаас шаардаж байна. Шаардлага биелүүлтэл хуульд заасан бүхий л хэлбэрээр эрс тэмцэх болно.

УДИРДАХ ЗӨВЛӨЛ