Монголын улс төр дампуурч байна. Ерөнхийлөгчийн сонгууль ойртсонтой холбогдуулаад манайд улс төрийн бохир технологи, юу ч хийхээс, ямар ч гүтгэлэг хийхээс буцахгүй байдалд хүрч байна.
Харамсалтай. Ийм сурталчилгаа явж байна.
Монгол улсын Ерөнхийлөгч гэдэг бол нийт ард түмний хүсэл зоригоор сонгогдсон улс төр болоод эрх зүйн хувьд хамгийн өндөр чадамжтай хүн байдаг. Монголын ард түмний сонгосон Ерөнхийлөгчийг үргэлж хүндэтгэж, үе үеийн Ерөнхийлөгч нартай хүндэтгэлтэй харилцаж ирсэн. Үүний дотроос одоогийн Ерөнхийлөгч Х.Баттулга бол Монголын улс төрчдийн дотроос тодорч гарсан эх орныхоо төлөө чин сэтгэлээсээ зүтгэж Монгол эх орны ардчиллыг бататгахын төлөө Монгол ард түмний эв нэгдлийн төлөө тууштай ажиллаж ирсэн хүн гэж боддог. Энэ талаас би үргэлж дэмжиж явдаг.
Ийм нөхцөлд, худал хуурмаг материал тарааж байгаа явдлаас харахад манай улс төрийн технологи болохгүй болжээ. Энэ бол ямар ч мунхруулга, гүтгэлэг хийхээс буцахгүй болсон байна гэдгийг харуулж байна.
Нөгөө талдаа миний нэрийг барьж ийм сурталчилгаа явуулна гэдэг бол эрүүгийн гэмт хэрэг. Энэ зөвхөн миний нэрийг барьсан хэрэг биш. Энэ бол Монголын ард түмнийг доромжилж буй гүтгэлэг. Тиймээс хууль хяналтын байгууллага үүний учрыг олоосой гэж бодож байна. Монголд бохир улс төрийн технологи явуулдаг байгууллага гарын таван хуруунд л багтана. Үүнийг олох тийм хэцүү биш байх.
Монголын төрийн эрх мэдлийн төлөө ямар ч бохир арга хийхээс буцахгүй болжээ. Үүний нэг нь Монгол улсын Ерөнхийлөгч Х.Баттулгыг сонгуульд оролцох боломж, эрх байхгүй талаар янз бүрийн улс төрийн инстицут, улс төрчдийн хүсэлд нийцүүлэн шийдвэрээ гаргаж байна. Энэ бол улс төрийн аюултай байдал үүссэн гэсэн үг. МАН-ыг тараах тухай асуудал нь одоогийн Монголын улс төрд тодорхой байр суурь эзэлж байгаа бүх улс төрийн хүчинд хамаатай асуудал.
Монголын улс төрийн намууд мафиоз маягийн улс төрийн бүлэглэлүүд боллоо. Нам дамжсан олигарх бүлэглэлүүдийн зарц боллоо. Намуудын санхүүжилт шударга бус замаар явж авилгачид намаар дамжуулж төрд орж ирж байгаа талаар яриад 10 гаруй жил болж байна.
Тэгэхээр Монголын улс төрийн намуудыг аль хэдийн цэвэрлэх цаг болсон. Улс төрийн намуудын бодлого нь ард түмнийг мунхруулахад л чиглэж байна. Сонгуулиар маш сайхан амлалт өгдөг сүүлд нь мартдаг.
Тиймээс улс төрийн намуудыг бүгдийг нь тараагаад шинэ хууль гаргаад, улс төрийнхөө бүтцийг зохиох хэрэгтэй. Ингэж байж Монголын улс төр цэвэршинэ.
Сэтгэгдэл1
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.