Сайд нар хэзээ төлөвшиж, хэзээ төрийн ажилд мэргэших вэ?
Уул, уурхай, хүнд үйлдвэрийн сайд Г.Ёндон саяхны нэгэн байнгын хорооны хуралдаан дээр Асгатын мөнгөний ордын талаар ОХУ-ын Элчин сайд И.К.Азизовтой уулзах үеэр яригдсан асуудлыг дэлгэв.
Г.Ёндон: ОХУ-ын Элчин сайд И.К.Азизов Асгатын мөнгөний ордын 51 хувийг Монголын төр эзэмшинэ гэвэл наад уурхай чинь ажиллахгүй гэж шулуухан хэлсэн хэмээн ноён Элчин сайдын байр суурийг пал хийтэл хэлээд орхих нь тэр.
Нэгдүгээрт, Асгатын мөнгөний орд нь стратегийн орд, хоёрдугаарт, ОХУ манай улстай стратегийн иж бүрэн түншлэлтэй, гуравдугаарт, Монгол улс гадаад харилцааны нэг цонхны бодлоготой. Гэтэл энэ чухал сэдвээр ОХУ-аас Монгол улсад суугаа онц бөгөөд бүрэн эрхт Элчин сайдын буюу хөрш орны байр суурийг яриа хэлэлцээрийн түвшинд нь ил гаргаж тавих нь зөв үү?
Монгол Улсын Засгийн газрын гишүүн сайд нар хэзээ төлөвшиж, хэзээ төрийн ажилд мэргэших вэ?
Соёлын сайд нь өөрийн хамаарал бүхий компанийн ургацын дээжийг төрийн ордонд, эрх бүхий албан тушаалтнуудад тараахдаа "Соёлын сайд" гэсэн шошго наасан, НХХ-ийн сайд нь төрсөн өдрийн мэндчилгээн дээр төрийн тамга дарсан гээд төрийн албаны наад захын ёс зүйгүй үйлдэл давтагдсаар л байна.
Хэдийгээр Монгол Улсын Сайд гэдэг албан тушаал нь туршлага хуримтлуулж, мэргэшүүлдэг албан тушаал биш боловч, "мэргэжлийн, залуу, гадаадад төгссөн, Харвардын боловсролтой" гэх мэтчилэн харж үзэх олон шалтгааны улмаас энэ удаагийн Засгийн газрын "эрээвэр хураавар" бүрэлдэхүүнийг Ерөнхий сайд нь ч цээжээрээ хамгаалж, олон нийт ч тэгсгээд орхисон билээ.
Ерөнхий сайд "шалдан ноён"-той тоглож, мушгиулсаар л суугаа. Энэ бол түүний хамгийн том сул тал. Үндсэн хуулийн өөрчлөлтөөр олж авсан хамгийн том эрх мэдлээ хав дарсаар байх нь түүнд өдөр ирэх бүр дарамт болж байгааг Ерөнхий сайд хэнээр ч хэлүүлэлтгүй мэдэж байх учиртайсан.
Сэтгэгдэл1
АНХААР!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд said.mn хариуцлага хүлээхгүй.